Fullbúið danshús í Reykjavík

Dansverkstæðið var stofnað af danshöfundunum Sveinbjörgu Þórhallsdóttur og Steinunni Ketilsdóttur sem voru að leita að heppilegu húsnæði fyrir vinnu sína. Þær tóku þá á leigu stórt rými við Skúlagötu og nú blómstrar þar sköpun í danslist.

„Mikil gróska hefur verið í dansinum hér á landi síðustu ár en það hefur ekki verið aðstaða fyrir sjálfstætt starfandi danshöfunda til að vinna að nýjum verkum,“ segir Tinna Grétarsdóttir, verkefnastýra Dansverkstæðisins.

„Sveinbjörg og Steinunn gerðu sér grein fyrir möguleikum húsnæðisins á Skúlagötu og í samstarfi við Ólöfu Ingólfsdóttur og Karenu Maríu Jónsdóttur, sem voru að vinna skýrslu um danshús á Íslandi, stofnuðu þær félagssamtökin Samtök um danshús, sem sér um rekstur Dansverkstæðisins,“ segir Tinna.

Samtökin hafa það markmið að reka fullbúið danshús í Reykjavík, sem verður öruggt framtíðarheimili danslistarinnar á Íslandi. Dansverkstæðið er duglegt að skipuleggja hina ýmsu viðburði og taka þátt í hátíðum í Reykjavík. Einnig hafa verið haldin hin vinsælu hádegispartí eða „lunch beat“ í þeirra húsum. Rýmið er vel nýtt og boðið er upp á spennandi morguntíma tvisvar í viku, þriðjudaga og fimmtudaga, sem hægt er að kíkja í eftir hentisemi.

„Reynt er að hafa fjölbreytta tíma sem henta dönsurum og dansáhugamönnum, til dæmis samtímadans, ballett, jóga, pilates, tangó og danseróbikk. Tímarnir eru stílaðir á lengra komna en allir eru velkomnir,“ segir Tinna.

Nánari upplýsingar á danceatelier.is