Hyggjast gera upp Keflavik Music Festival

„Uppgjör á festivalinu stendur núna yfir,“ segir DJ Óli Geir, en hann komst í fjölmiðla fyrr á árinu sem einn skipuleggjenda Keflavik Music Festival.

Eins og margir muna ef til vill eftir voru tónlistarmenn afar ósáttir við skipulag hátíðarinnar og gagnrýndu DJ Óla Geir og félaga hans, Pálma Þór Erlingsson, sem einnig var í forsvari fyrir hátíðina, harðlega fyrir vikið.

Fjölmargar hljómsveitir hættu við að spila á hátíðinni þar sem þær töldu tónleikahaldara ekki standa við gerða samninga.

„Við erum að gera upp við þá íslensku tónlistarmenn sem eftir eru þessa dagana. Við erum að gera þetta hægt og rólega eftir allt sem gekk á. Við stefnum að því að vera búnir að gera upp við alla fyrir áramót,“ bætir Óli Geir við.

„Það var aldrei inni í myndinni að gera ekki upp við eitthvert atriði þó svo að hátíðin hafi endað í stóru tapi sem hljóp á milljónum,“ segir Óli Geir jafnframt.

Hljómsveitin Skálmöld var meðal þeirra sem komu fram á hátíðinni. Kristinn Thorarensen, umboðsmaður hljómsveitanna Skálmaldar, Vintage Caravan og 1860, segist ekkert hafa heyrt frá forsvarsmönnum hátíðarinnar í langan tíma.

„Þeir komu til okkar að fyrra bragði til þess að gera upp, stuttu eftir hátíðina. Síðan hef ég sent fjölda tölvupósta og meðal annars talað tvisvar við Pálma í síma. Hann var boðinn og búinn til að leysa málið, en síðan hef ég ekkert heyrt. Ég tel mig, og okkur, hafa sýnt þeim mikinn skilning,“ segir Kristinn.

„Ég hef reynt að fá þá til að setjast niður með okkur í góðu og leysa málin, en hef engin svör fengið enn,“ bætir Kristinn við.

„Ég bíð spenntur við símann,“ segir hann.

Fréttastofa ræddi við meðlimi þriggja hljómsveita til viðbótar sem komu fram á hátíðinni en vildu ekki koma fram undir nafni. Hljómsveitirnar höfðu ekkert heyrt frá Óla Geir og Pálma, forsvarsmönnum hátíðarinnar, og vissu ekki hvort eða hvenær von væri á greiðslu.

Einn meðlimur hjómsveitar, sem fréttastofa nálgaðist, hafði þó heyrt frá þeim en enga greiðslu fengið.