Hrekkjavökugraskerin vinsælli nú en áður

„Það er mikill vöxtur í graskerssölu hér á landi. Áður fyrr voru þau alltaf svo stór en nú eru þau fáanleg minni og neytendavænni,“ segir Gunnar Ingi Sigurðsson, framkvæmdastjóri Hagkaups. Hann stendur í ströngu þessa dagana við að selja grasker til að fullkomna hrekkjavöku landsmanna.

Áhugi landsmanna á hrekkjavökunni hefur aukist mikið á seinni árum og hefur sala á graskerum aukist samhliða því, samkvæmt sölutölum Hagkaups. „Við seljum svona fimm til sex tonn af graskerum á ári en graskerssalan fer nú að nálgast hámarkið,“ bætir Gunnar Ingi við.

Samkvæmt heimildum Fréttablaðsins eru talsvert margar verslanir hér á landi sem selja grasker. Flest eru þau á stærð við fótbolta og vega frá tveimur kílóum og upp í fimm kíló. Fólk sker þau út og setur oft kerti inn í þau.

Allt árið um kring eru í sölu matargrasker sem eru minni en klassísku hrekkjavökugraskerin. „Þessi hefðbundnu hrekkjavökugrasker koma hingað til lands svona tveimur til þremur vikum fyrir hrekkjavöku,“ segir Gunnar Ingi að lokum.