Bar að auglýsa úthlutun við Fjallsárlón

Fyrirtækið Must Visit Iceland á ekki heimtingu á að setja upp aðstöðu fyrir þjónustu sína í þjóðlendu við Jökulsárlón.

Must Visit Iceland óskaði fyrir þremur árum eftir heimild Hornafjarðar til að koma upp aðstöðu við Jökuslárlón en sveitarfélagið hafnaði því. Fyrirtækið kom sér engu að síður fyrir á vesturbakka lónsins á árinu 2011 og hefur verið þar síðan. Á þessu ári var svo sótt um leyfi að nýju en því var aftur hafnað og kærði fyrirtækið þá synjun.

Must Visit Iceland taldi sig hafa óformlegt leyfi fyrir starfsemi sinni frá byggingarfulltrúa og vísaði einnig í að Hornafjörður hefði veitt fyrirtækinu Fjallsárlóni ehf. leyfi fyrir stöðuleyfi fyrir kerrum, bryggju og þremur slöngubátum við Fjallsárlón sem er skammt vestan við Jökulsárlón. Fyrirtækin selja bæði bátsferðir.

Forsætisráðuneytið segir stöðuleyfið til Fjallsárlóns ehf. ekki hafa verið í samræmi við góða stjórnsýsluhætti og því ekki hægt að miða við þá leyfisveitingu. Ráðstöfun lands og landsréttinda innan þjóðlendna feli í sér úthlutun takmarkaðra gæða sem geti haft mikla fjárhagslega þýðingu.

„Í samræmi við góða stjórnsýsluhætti er því rétt að tilkynna í auglýsingu um hina fyrirhuguðu leyfisveitingu og kalla eftir umsóknum um að hljóta leyfi til nýtingar lands eða landsréttinda innan þjóðlendu áður en leyfi er veitt. Slík stjórnsýsluframkvæmd stuðlar að jafnræði borgaranna og gegnsærri stjórnsýslu,“ segir forsætisráðuneytið.

Þá segir forsætisráðuneytið það hafa verið málefnalegt og lögmætt hjá Hornafirði að synja um uppbyggingu við Jökulsárlón þar sem í aðalskipulagi sé ekki gert ráð fyrir atvinnustarfsemi þar.