Segir starfsfólki beitt í pólitískum átökum

„Augljóst er að bæjarfulltrúi er í pólitískum skylmingum við undirritaða og dregur inn í það starfsmenn Kópavogsbæjar sem er til vansa,“ segir Rannveig Ásgeirsdóttir, formaður bæjarráðs Kópavogs, í bókun með svari sínu við fyrirspurn Guðríðar Arnardóttur bæjarfulltrúa um hlutverk Rannveigar sem „verkefnisstýru“ Hamraborgarhátíðar.

Í fyrirspurn sem Guðríður setti fram á bæjarráðsfundi 5. september var meðal annars spurt hver hefði ráðið Rannveigu sem verkefnastýru Hamraborgarhátíðar og hvaða starfsmenn hefðu unnið undir hennar stjórn.

Rannveig svaraði fyrirspurninni í bæjarráði síðasta fimmtudag. Þar kom fram að bæjarsjóður hefði ekki lagt peninga í hátíðina, sem hefði valdið Miðbæjarsamtökunum vonbrigðum, og að hún hefði unnið í sjálfboðavinnu fyrir þau – eins og hún hefði gert á öllum hátíðum frá 2010.

Að sögn Rannveigar sá hún meðal annars um að taka á móti tölvupóstum bæjarbúa og gesta, telja út bílastæði og leikja- og sýningarsvæði og halda uppi hvatningu á Facebook-síðu hátíðarinnar, hirða rusl og annast frágang eftir hátíðina. „Engir starfsmenn unnu undir minni stjórn,“ undirstrikar bæjarráðsformaðurinn.

Málið kom til umræðu á bæjarstjórnarfundi síðastliðinn þriðjudag. Rannveig segir að Guðríður hafi þar sagst hafa vitneskju frá ónefndum starfsmönnum bæjarins um að Rannveig hafi farið út fyrir valdsvið sitt sem kjörinn fulltrúi og skipað starfsmönnum fyrir í aðdraganda Hamraborgarhátíðar.

„Bæjarfulltrúinn Guðríður lýsir fjálglega ýmsum aðstæðum, jafnvel klæðaburði sjálfboðaliða á hátíðinni, án þess að hafa sjálf verið viðstödd, en telur ástæðu til þess að taka málið upp með öflugum myndlýsingum.

Ekki síst gefur hún í skyn með afgerandi hætti að undirrituð hafi brotið samskiptareglur Kópavogsbæjar hvað varðar samskipti kjörinna fulltrúa og starfsmanna,“ bókaði Rannveig, sem óskaði eftir því að stjórnsýslusvið bæjarins skilaði greinargerð „til þess að tryggja gegnsæja, sanngjarna og áreiðanlega meðferð málsins“.

Guðríður hafnar því að fyrirspurn hennar hafi verið „pólitískar skylmingar“. Hún hafi einfaldlega fengið ábendingu sem hún hafi fylgt eftir þar sem bæjarfulltrúar hafi eftirlitsskyldu. „Ég lagði einfaldlega fram fyrirspurn og fékk svar. Málinu telst þar með lokið af minni hálfu,“ segir hún.