Óþolandi að háspennulínan sé ekki farin segir bæjarstjóri Hafnarfjarðar

Bæjarstjóri Hafnarfjarðar segir að ef ekki væri fyrir nýjan viðauka við samkomulag við Landsnet gæti fyrirtækið látið háspennulínur við Vallahverfi standa þar til þær ónýtast. Fulltrúi sjálfstæðisflokks segir Samfylkingu og VG "algjörlega ábyrg“.

Guðrún Ágústa Guðmundsdóttir, bæjarstjóri Hafnarfjarðar, segir það ekki á færi bæjaryfirvalda að þvinga Landsnet til að taka strax niður háspennulínu og tengivirki við Vallahverfi.

Í Fréttablaðinu í gær sagði íbúi í Vallahverfi mikið ónæði af háspennulínunni og tengivirki við hverfið. Íbúarnir væru ósáttir við að brotthvarfi mannvirkjanna hafi verið frestað allt til ársins 2020. Samkvæmt samningi hafi línurnar átt að vera farnar á árinu 2011.

„Að sjálfsögðu erum við sammála íbúunum um að það er alveg óþolandi að þessar línur séu ekki farnar eins og samkomulagið upphaflega við Landsnet frá 2009 gerði ráð fyrir,“ segir Guðrún. „En samkvæmt skýrum fyrirvörum í samkomulaginu hefðu línurnar geta staðið þar til þær væru ónýtar.“

Bæjaryfirvöld fóru fram á viðauka við samkomulagið þegar þróunin á raforkumarkaði varð ekki eins að var stefnt.

„Í viðaukanum eru föst tímamörk og mælt fyrir um að Landsnet byrji í síðasta lagi að taka þetta niður árið 2016. Hins vegar ef raforkufrekar framkvæmdir fara fyrr í gang þá fari línan fyrr. Við erum því búin að ljúka allri okkar vinnu og það stendur ekkert á Hafnarfirði,“ segir bæjarstjórinn.

Rósa Guðbjartsdóttir, bæjarfulltrúi Sjálfstæðisflokks, segir ljóst að það sé „algjörlega á ábyrgð meirihluta Samfylkingar og VG í bæjarstjórn og svo fyrrverandi ríkisstjórnar sömu flokka“ að tímamörk um brottnám raflínannna hafi ekki staðist. Rio Tinto Alcan hafi boðist til að leggja raflínurnar í jörð ef álverið í Straumsvík hefði fengið að stækka. „En málið var sett í íbúakosningu árið 2007, algjörlega á ábyrgð þessara flokka,“ segir Rósa.

Síðan segir Rósa að samkomulagið við Landsnet frá árinu 2009 um hafi ekki haldið þar sem sem ríkisstjórn Samfylkingar og VG hafi beitt sér mjög gegn uppbyggingu orkufreks iðnaðar. Ekki hafi verið fjárhagslegar forsendur fyrir brottflutningi línanna.

„Auðvitað vildi maður að bæjarstjórnin gæti beitt sér fyrir því að samkomulagið verði endurskoðað svo hægt verði að efna þau loforð sem íbúum á þessu svæði voru gefin fyrir mörgum árum og áður en frekari uppbygging á svæðinu fer fram. En líklega er það um seinan nema með gríðarlegum tilkostnaði fyrir bæinn,“ segir Rósa Guðbjartsdóttir.