Ölfusingar heitir fyrir salíbunuferðunum

Góður gangur er á umleitunum fyrirtækisins Zalibuna til að fá fjárfesta til liðs við sig til að koma upp rennileið niður Kambana.

Að sögn Skúla Sigurðssonar, fjármálastjóra Zalíbunu, hefjast viðræður við þrjá hugsanlega fjárfesta í þessari viku.

"Og svo förum við til Austurríkis þann 23. september til þess að ræða við Brandauer sem er umboðsaðili brautarinnar og funda með honum og fara yfir stöðu mála," segir hann. "Þetta ætti því allt að skýrast á næstu mánuðum," bætir hann við.

Vonir standa til þess að hægt verði að fara í salíbunur niður Kambana vorið 2015.

Fyrirtækið kynnti hugmyndirnar fyrir skipulags-, byggingar- og umhverfisnefnd Ölfuss og eins er búið að ræða við Orkuveituna og Vegagerðina um hugmyndina. Skúli segir að mikill áhugi sé meðal Ölfusinga um málið.

Nái áformin fram að ganga verður lögð stæðileg rá niður Kambana en á henni geta sleðar runnið niður hlíðina. Sá sem situr í sleðanum ræður hraða ferðarinnar en hann hefur milli fóta sér stöng sem virkar eins og bremsa. Ef menn snerta ekki við hemlum þessum má ná 40 kílómetra hraða á klukkustund.