Halda Dýrunum í Hálsaskógi

Ekkert verður af dómsmáli sem Þjóðleikhúsið höfðaði gegn Senu vegna ágreinings um útgáfurétt að 46 ára upptöku Ríkisútvarpsins á Dýrunum í Hálsaskógi. Sátt náðist er frumskjöl fundust komu í leitirnar. Sena heldur útgáfuréttinum áfram.

Þjóðleikhúsið og Sena hafa náð sátt um útgáfurétt að upptöku Ríkisútvarpsins frá 1967 á Dýrunum á Hálsaskógi.

Um er að ræða hljóðupptöku með Bessa Bjarnasyni, Árna Tryggvasyni og fleiri leikurum Þjóðleikhússins. Þessa útgáfu kannast margar kynslóðir Íslendinga mæta vel við. Verkið var upphaflega gefið út af SG-hljómplötum sem þegar fram liðu stundir runnu inn í Senu.



Þjóðleikhúsið taldi Senu ekki eiga höfundaréttinn að upptökunum og stefndi fyrirtækinu fyrir Héraðsdóm Reykjavíkur þar sem taka átti málið fyrir á morgun. Ekkert verður þó úr dómsmálinu.

„Það var um tíma uppi óvissa og ágreiningur um það hvort Sena hefði útgáfuréttinn,“ segir Gunnlaugur Úlfsson, lögmaður Senu. „Málið reyndist hins vegar á misskilningi byggt og það er verið að ganga frá smáatriðunum í samkomulagi á milli aðila.“

Gunnlaugur segir niðurstöðuna vera þá að Sena hafi útgáfuréttinn. „Það er hins vegar gert samkomulag sem er trúnaðarmál milli aðila. Það felur ekki í sér neinar sérstakar greiðslur út af þessu máli.“

Útgáfurréttur SG-Hljómplatna á Dýrunum í Hálsaskógi hefur að sögn Gunnlaugs gengið kaupum og sölum þar til hann endaði hjá Senu. Upptakan er með leikurum úr Þjóðleikhúsinu.

„Þjóðleikhúsið sem hefur sýningarréttinn að verkinu vildi kannski fá á hreint hvort Sena hefði þennan rétt. Eftir að málið var höfðað fór í gang vinna við að leita að öllum frumsamningum og -skjölum og þau komu í leitirnar. Þannig að þetta er allt komið á hreint,“ segir útskýrir Gunnlaugur.

„Þetta var bara rifrildi sem er búið,“ segir Ari Matthíasson, framkvæmdastjóri Þjóðleikhússins, aðspurður um deiluna. Ekkert sé því frekar um málið að segja.

Dýrin í Hálsaskógi eftir Thorbjörn Egner voru frumflutt á Íslandi. Það gerði einmitt Þjóðleikhúsið árið 1962. Um þessar mundir er fimmta uppfærslan af verkinu á sviði leikhússins.