Vantar vinnandi hendur á Hólmavík

Verið er að auglýsa eftir fólki í ýmis störf á Hólmavík. Þar er þjónustustig hátt miðað við önnur sveitarfélög af svipaðri stærð. Það ásamt því hvernig Strandamenn hafa getað nýtt sér tækifærin varðandi sjósókn veldur íbúafjölguninni.

Skortur er á húsnæði í Hólmavík og þar vantar einnig fólk til vinnu að sögn Andreu Kristínar Jónsdóttur, sveitarstjóra Strandabyggðar. Nýlega var byggt þriggja íbúða raðhús en eftirspurnin er mun meiri en svo að það hafi bjargað.

„Það vantar aðallega íbúðir fyrir ungt fólk,“ segir Andrea Kristín. „Þannig að fólk geti flutt að heiman frá foreldrum sínum og eins fyrir unga fólkið sem er kannski að koma heim úr námi.“

Aðspurð um þennan lúxusvanda segir Andrea að Strandamenn hafi verið duglegir við að nýta sér tækifærin í sjávarútvegi eins og til dæmis með strandveiðum, grásleppu- og makrílveiðum.

Þar sé einnig þjónustustigið hátt miðað við mörg önnur sveitarfélög. Þar er til dæmis pósthús og tvö bankaútibú og mikil starfsemi í Þróunarsetrinu sem þar er til húsa. Einnig eru Vegagerðin, Orkubú Vestfjarða og Heilbrigðisstofnun Vesturlands með starfsemi í sveitarfélaginu.

Auglýst eftir fólki

Enn fremur segir Andrea að verið sé að auglýsa eftir fólki til vinnu. 

„Við erum náttúrulega að manna leikskólann hérna, Sorpsamlag Strandasýslu er að auglýsa eftir starfsmanni í fullt starf, ég veit að kaupfélagið hefur verið að leita að starfsfólki og eins veitingastaðurinn hérna hjá okkur og svo erum við að óska eftir starfsfólki á Héraðsbókasafnið. Þannig að það eru næg atvinnutækifæri hérna og hér er ekki atvinnuleysi.“

Andrea fagnar því einnig að næsta vetur geti nemendur stundað framhaldsskólanám í svokölluðu dreifnámi, sem þýðir að nemendur á fyrstu tveimur árunum í framhaldsskóla þurfa ekki að leggja land undir fót. Andrea segir muna mikið um þetta því næsti framhaldsskóli sé í Borgarnesi.

Það er ekki nóg með að ásókn sé meðal manna en mikill fjöldi hvala af ýmsum stærðum og gerðum hefur verið á svamli úti fyrir Ströndum. 

„Ég sé þetta út um gluggann svo maður byrjar daginn á því að heilsa hvölunum.“