Sölumaður lífgaði við dreng á bílaplani

„Ég fann hvað maður getur verið vanmáttugur þegar á hólminn er komið,“ segir Ævar Jónsson sölumaður sem bjargaði lífi sjö ára drengs fyrir utan verslun Flügger á Akureyri á mánudag.

Ævar segir að kona hafi komið akandi að málningavöruversluninni með sjö ára son sinn í aftursætinu. „Strákurinn var orðinn eitthvað undarlegur í bílnum svo hún tók hann út en þá var hann orðinn meðvitundarlaus,“ segir Ævar.

Að sögn Ævars hlupu hann og fleiri út þegar konan kallaði á hjálp. Svo hafi virst sem staðið hafi í litla drengnum og lítt hafi gengið að losa um það með því að berja á bak hans eða beita hann sérstöku taki. Þó hafi hann kastað örlítið upp.

„En hann hélt samt áfram að blána og stífna. Það gerðist ekki neitt fyrir enn við vorum búnir að blása í hann og hnoða,“ lýsir Ævar atburðarásinni.

Ævar segist hafa sótt skyndihjálparnámskeið á árinu 1995. Móðir drengsins hafi einnig haft kunnáttu á þessu sviði. „Hún gat hins vegar skiljanlega ekki vel beitt sér sökum geðshræringar,“ segir Ævar sem kveður móðurina þó hafa gefið góð ráð á meðan á lífgunartilraununum stóð.

Atvikið segir Ævar hafa orðið sér áminning um að drífa sig aftur á skyndihjálparnámskeið. „Maður hálf partinn skammaðist sín eftir á. Manni fannst maður ekki kunna neitt og ekki geta gert neitt þótt það hafi rifjast upp á meðan á þessu stóð,“ segir Ævar sem kveður fyrir öllu að lánast hafi að bjarga drengnum.

„Það tókst í þetta skiptið. Það komu þarna fleiri að svo að sem betur fer var ég ekki einn í þessu. Það fór allt í gríðarlegt stress ekki síst vegna þess að við vorum með barn í höndunum.“

Drengurinn og foreldrar hans heimsótttu Ævar í búðina í gær og þökkuðu honum lífgjöfina. „Þau komu hérna með blóm og þökkuðu fyrir sig. Strákurinn var bara hinn hressasti,“ segir Ævar en í samtali við Fréttablaðið kveðst móðirin ekki vilja tjá sig um atvikið.