Tuttugu ár síðan Þór vann tvo útileiki í röð

Þórsarar eiga möguleika á því í kvöld að afreka það sem karlaliði félagsins hefur ekki tekist í efstu deild í meira en tuttugu ár – að vinna tvo útileiki í röð.

Þórsliðið heimsækir þá Skagmenn í 10. umferð Pepsi-deildar karla en Þórsarar unnu 3-1 sigur í Keflavík á sunnudagskvöldið. Þórsarar unnu síðast tvo útileiki í röð í efstu deild í upphafi sumarsins 1993 (2-1 sigur á Fram 27. maí 1993 og 2-1 sigur á Víkingi 9. júní 1993).

Frá þeim tíma hafa Þórsarar ekki fengið eitt einasta stig í næsta útileik eftir sigurleik á útivelli.

Þórsarar eru til alls vísir enda hafa þeir unnið alla „sex-stiga“ leiki sína í sumar á móti Víkingi (1-0), Fylki (4-1) og Keflavík (3-1).

Leikur ÍA og Þórs hefst klukkan 18.00 en aðrir leikir kvöldsins eru: Víkingur Ó.-Fylkir (kl. 19.15) og FH-Fram (kl. 20.00, beint á S2 Sport).