Ásgeir Börkur hugsanlega á leiðinni heim

Fylkismenn eru í erfiðum málum í Pepsi-deild karla og liðið horfir fram á að missa fjóra leikmenn í næsta mánuði.

Andrés Már Jóhannesson er í láni hjá félaginu til 15. júlí en Fylkir á möguleika á því að lengja lánið um mánuð. Þeir Davíð Þór Ásbjörnsson, Oddur Ingi Guðmundsson og Andri Þór Jónsson eru svo allir á leið til útlanda í nám í ágúst.

Svo herma heimildir Fréttablaðsins að staða þeirra Tryggva Guðmundssonar og Heiðars Geirs Júlíussonar sé ekki sterk hjá félaginu og þeir gætu verið á leið út.

Á móti kemur að Ásgeir Börkur Ásgeirsson gæti verið á leið heim en hann er í láni hjá Sarpsborg í Noregi en sá lánstími rennur út 15. júlí.

„Það er bara tvennt í stöðunni. Annaðhvort kaupa þeir hann eða hann kemur heim. Auðvitað viljum við helst fá hann heim, okkur veitir ekki af. Við skiljum samt að hann vill eðlilega vera áfram í atvinnumennsku,“ sagði Ásgeir Ásgeirsson, formaður knattspyrnudeildar Fylkis.

Ásgeir sagði enn fremur að Fylkismenn væru að skoða að fá sterkan erlendan leikmann til þess að bregðast við komandi forföllum.