Hefði viljað fá endurgreitt

„Ég var að finna mig mjög vel. Þetta var í fyrsta skipti í sumar sem ég spilaði alveg heill heilsu þannig að mér leið betur,“ sagði Arnór Eyvar Ólafsson, leikmaður ÍBV, sem átti skínandi leik fyrir sitt lið er það vann Fram, 1-0, í Eyjum.

Arnór hefur verið að glíma við leiðindi í ökkla en öll þau vandræði eru nú að baki.

Leikurinn var reyndar ekki mikið fyrir augað og ekki peninganna virði eins og maðurinn sagði.

„Ef ég hefði verið í stúkunni hefði ég líklega viljað fá endurgreitt,“ sagði Arnór og hló við.

„Það var afar lítið um heppnaðar sendingar framan af leik. Við vorum að komast í ágætar stöður en vorum klaufar á síðasta þriðjungnum. Það var í raun ekki fyrr en við komumst yfir sem leikurinn fór í gang.“

ÍBV er með 15 stig í sjötta sæti deildarinnar. „Það var gott að komast aftur á sigurbraut. Einnig mikilvægt að slíta okkur frá neðri hlutanum. Við viljum vera ofar.“