Vara sjósundfólk við saurgerlum í Fossvogi

Út þessa viku má búast við að saurgerlamengun verði yfir viðunandi mörkum í Fossvogi. Fólki er ráðlagt að stunda hvorki sjósund né siglingar þar á meðan.

Endurnýjun á dælum í fráveitustöð við Hafnarbraut í Kópavogi hófst í gær. Venjulega er skolpi dælt frá stöðinni yfir til Reykjavíkur og þaðan út á flóa. Þar til nýju dælunum hefur verið komið fyrir mun skolp Kópavogsbúa hins vegar renna út í Fossvoginn.

„Það er fínt að þeir skuli vera að koma sínum málum í lag en það er bagalegt að þetta sé ekki orðið betra en það er. Það kemur alltaf illa við okkur þegar skolpið er sent út,“ segir Ragnheiður Valgarðsdóttir, formaður Sjósunds- og sjóbaðsfélags Reykjavíkur.

Stefán L. Stefánsson, deildarstjóri á umhverfissviði Kópavogs, segir dælurnar á Hafnarbraut fimmtán ára gamlar. „Þær eru mjög slitnar og afköstin ekki nægjanlega mikil, þannig að dælustöðin er að fara of mikið á yfirfall. Að okkar mati er það óásættanlegt og við erum að laga það,“ segir Stefán.

Ekki hefur allt sjósundfólk sömu afstöðu og Ragnheiður. „Ég á bágt með að skilja að leyfilegt sé að dæla skólpi undan Kópavogsbúum þarna út og að á dögum nútímatækni séu ekki aðrar leiðir færar,“ skrifar til að mynda ein sjósundkona á Facebook.

„Við treystum okkur ekki í neina aðra lausn,“ segir Stefán og bendir á að um stöðina við Hafnarbraut fari sex til sjö hundruð lítrar á sekúndu.

Þá segir Stefán að á meðan framkvæmdir standi yfir við Hafnarbraut hafi þrýstilögn sem flytur skolp frá Garðabæ yfir Kópavoginn að Sunnubraut verið sett á yfirfall til að minnka mengunarálag í Fossvoginum.

„Sjósundmenn verða ekki kátir með þetta en þeir verða betur settir á eftir,“ segir Stefán, sem býst við að nýju dælurnar verði teknar í gagnið á föstudag eða laugardag. „Við mælumst til að menn stundi ekki sjósund þangað til við erum búnir að sannreyna að sjórinn sé ómengaður. Þetta er gerlamengun og hún er hættuleg,“ varar hann við.

Ragnheiður segir sjósundfólk einmitt munu halda sig fjarri Fossvoginum næstu daga. „Við ætlum að fjölmenna upp á Kjalarnes og synda fyrir neðan Klébergslaugina. Við mætum svo bara galvösk aftur í Nauthólsvíkina í næstu viku þegar hún er búin að hreinsa sig,“ segir formaður sjósundkappanna.

gar@frettabladid.is