Hápunktur hátíðarinnar er hin svokallaða Big Jump-keppni sem verður í gilinu annað kvöld klukkan 21. Þar munu tuttugu efnilegir brettamenn keppa um Ak Extreme titilinn og hringinn.
Egill Tómasson, einn aðstandenda hátíðarinnar, segir keppendurna í ár vera á aldrinu átján til 37 ára.
„Eiríkur Helgason fer fyrir fjögurra manna dómnefnd. Hann er okkar fyrsti atvinnumaður í íþróttinni og væri sjálfur að keppa í Big Jump-keppninni ef hann væri ekki rifbeinsbrotinn," segir Egill.
Yngri bróðir Eiríks, Halldór Helgason, verður þó á meðal keppenda. „Halldór var meiddur í fyrra og sat þá í dómnefndinni. Þeir virðast skiptast á, bræðurnir."
Halldór sýnir ekki aðeins listir sínar á brettinu heldur þeytir einnig skífum í slagtogi við MC Gauta á Græna hattinum seinna um kvöldið. Þetta mun vera í fjórða sinn sem Halldór spreytir sig sem plötusnúður og að sögn Egils spilar hann allt frá dauðametal til teknó tónlistar.
Stökkpallurinn sem notaður verður í Big Jump-keppninni er sá stærsti til þessa og tók það fimmtán manna hóp fimm daga að smíða hann. Pallurinn verður svo fjarlægður strax að keppni lokinni.
