Yfirmenn jarðhitaverkefna fái reynslu hér

Framkvæmdastjóri hjá Alþjóðabankanum hefur lagt til að íslensk stjórnvöld víkki út hlutverk Jarðhitaskóla Sameinuðu þjóðanna og bjóði yfirmönnum nýrra jarðhitafyrirtækja erlendis upp á þjálfun hér á landi.

Þetta kom fram í máli Össurar Skarphéðinssonar utanríkisráðherra þegar hann setti alþjóðlega jarðhitaráðstefnu í Hörpu í gær.

Sri Mulyani Indrawati, framkvæmdastjóri hjá Alþjóðabankanum, sagði í erindi sínu á ráðstefnunni mikilvægt fyrir aðrar þjóðir að nýta sér þekkingu og reynslu Íslendinga í jarðhitamálum.

Hún sagði að minnsta kosti fjörutíu ríki eiga nægar jarðhitaauðlindir til að virkja. Vandinn við jarðhitann, eins og aðra endurnýjanlega orkugjafa, væri hár stofnkostnaður.

Auk þess að víkka út hlutverk jarðhitaskóla sagði hún mikilvægt að sem flestir fjármálaráðherrar ríkja sem gætu nýtt jarðhita heimsæktu landið. Þannig gætu þeir fengið reynslu Íslendinga beint í æð og væru líklegri til að beita sér fyrir fjárútlátum til jarðhitaverkefna. Eins og tilkynnt var seint á síðasta ári er fram undan viðamikið samstarf Íslands og Alþjóðabankans þar sem leita á að jarðhita í þrettán ríkjum Austur-Afríku.

Alþjóðabankinn mun byggja upp 65 milljarða króna sjóð og munu íslensk stjórnvöld leggja 800 milljónir króna í sjóðinn. Þá munu Íslendingar aðstoða ríkin við jarðhitaleit og nauðsynlegar grunnrannsóknir.