Krefur Akranes um 64 milljónir í bætur

Mistök bæjaryfirvalda við auglýsingu skipulags varð til þess að gera þurfti nýtt deiliskipulag. Verktaki sem hugðist reisa hótel á Akranesi krefur bæinn bóta.

„Ég tel að það hafi verið brotið á mér og miðað við það sem fram kemur í matsgerðinni er ljóst að svo er,“ segir Bjarni Jónsson, verktaki á Akranesi. Hann hefur krafið bæinn um 63,6 milljónir króna í bætur vegna vanefnda á skipulagi.

Bjarni festi kaup á Heiðarbraut 40, eða gamla bókasafninu, og hugðist reisa þar hótel. Bæjaryfirvöld samþykktu breytt skipulag á reitnum í október 2009, og Bjarni fór að undirbúa verkefnið. Babb kom þó í bátinn þegar í ljós kom að bæjaryfirvöld höfðu ekki staðið rétt að auglýsingu á breyttu skipulagi í B-tíðindum Stjórnartíðinda og því hófst vinna við skipulagið á ný.

Í millitíðinni höfðu orðið meirihlutaskipti í bænum, þegar Samfylkingin og Framsóknarflokkurinn tóku við völdum af Sjálfstæðisflokki og F-lista. Ákveðið var að gera nýtt skipulag fyrir svæðið sem rúmaði ekki þá starfsemi sem Bjarni Jónsson hafði hafið undirbúning að og falla þannig frá fyrri samþykktum bæjarstjórnar.

Meirihlutinn klofnaði í málinu og fimm fulltrúar af sjö samþykktu, í október 2011, að breyta um stefnu. Tveir fulltrúar Sjálfstæðisflokksins, sem höfðu stutt fyrra skipulag, gerðu það einnig.

Fréttablaðið hefur heimildir fyrir því að lögfræðingar hafi varað bæjaryfirvöld við því að sú ákvörðun gæti skapað bænum skaðabótaskyldu og eins og áður segir hefur Bjarni nú krafið bæinn um 64 milljónir króna.

Sveinn Kristinsson, bæjarfulltrúi Samfylkingarinnar og forseti bæjarstjórnar, segir að reynt sé að leita sátta í málinu. Sjálfur var hann á móti því að skipulaginu yrði breytt. Hann segir það hafa legið í loftinu að slíkt myndi skapa skaðabótaskyldu.

„Menn könnuðu það og töldu líklegt að það gæti orðið vegna þess að þarna var sannarlega stefnubreyting.“

Gunnar Sigurðsson, bæjarfulltrúi Sjálfstæðisflokksins, var forseti bæjarstjórnar þegar fyrra skipulagið var samþykkt, en samþykkti breytt skipulag árið 2011. Hann segist hafa skoðað málið og telji að ekki henti að hafa hótel á þessum stað, sérstaklega vegna flutninga til og frá sjúkrahúsinu. En óttaðist hann ekki bótakröfu?

„Það hlýtur þá að þurfa að hugsa bæjarmálasamþykktir og annað upp á nýtt, ef það er ekki réttur okkar til að samþykkja eða hafna skipulagi. Það er þá náttúrulega stórmál.“