Færri þurfa sérstakan stuðning í stærðfræði

Færri nemendur þurfa sérstakan stuðning í stærðfræðinámi en áður. Þetta kemur fram í niðurstöðum stærðfræðiskimunar sem lögð var fyrir í þriðja bekk reykvískra grunnskóla í fyrravor.

Fram kemur á vef Reykjavíkurborgar að 4,3 prósent nemenda hafi talist þurfa sérstakan stuðning í stærðfræði. Er það tveimur prósentustigum lægra hlutfall en 2011 og lægsta hlutfallið á tímabilinu 2007 til 2012. „Þorri nemenda, eða 96 prósent, telst samkvæmt skimuninni ólíklegur til þess að þurfa stuðning í stærðfræðinámi,“ segir á vef borgarinnar.

Haft er eftir Oddnýju Sturludóttur, formanni skóla- og frístundaráðs Reykjavíkur, að niðurstöðurnar rími við aðrar mælingar á árangri skólabarna í Reykjavík undanfarin misseri. Hún segir árangur hafa batnað á langflestum sviðum, líðan nemenda sé betri, einelti hafi minnkað og ánægja foreldra sé meiri. Þakka megi öflugum og metnaðarfullum kennurum fyrir sinn þátt í árangrinum.

Oddný segir góða kennara skapa gott skólastarf og reykvískir kennarar setji velferð og framfarir nemenda sinna í fyrsta sæti.

- óká