Flestir hættu við uppsögn

Aðkomu ríkisins er þörf til að leysa úr vanda annarra kvennastétta við Landspítalann (LSH) sem vilja fá sambærilega leiðréttingu kjara og hjúkrunarfræðingar hafa fengið.

„Ekki eru til aurar hér, því miður,“ segir Erna Einarsdóttir, framkvæmdastjóri mannauðssviðs LSH og formaður kjara- og launanefndar spítalans. Hún segir ljóst að við taki strangar viðræður við aðra hópa um endurskoðun stofnanasamninga í takt við yfirlýsingar um innleiðingu jafnlaunastefnu ríkisstjórnarinnar. Erna vísar til yfirlýsinga Guðbjarts Hannessonar velferðarráðherra um að byrja ætti á að leiðrétta kjör heilbrigðisstétta og að þar hafi hjúkrunarfræðingar verið fyrstir. „Guðbjartur hefur jafnframt lýst því yfir að geislafræðingar og lífeindafræðingar séu með í þeirri yfirferð og margar yfirlýsingar komið fram um aðra.“

Um hádegisbil í gær höfðu rúmlega 80 prósent hjúkrunarfræðinga sem sagt höfðu upp störfum dregið uppsögn sína til baka. „Og helst viljum við fá alla til baka,“ segir Erna. Endanlegar tölur liggi þó ekki fyrir fyrr en á mánudag, þar sem einhverjar tilkynningar gætu átt eftir að berast í pósti.

Eftir helgi fer Efling – stéttarfélag fram á viðræður um endurskoðun stofnanasamninga við LSH og fylgir þar í kjölfarið á Sjúkraliðafélaginu. „Starfsmenn innan Eflingar sem vinna hjá Landspítalanum og á hjúkrunarheimilum eru nánast hrein kvennastétt enda yfir 96 prósent kvenna sem sinna þessum störfum,“ segir í erindi sem Efling hefur sent spítalanum í kjölfar breytinga á samningi hjúkrunarfræðinga.

Kveðst félagið líta svo á að yfirlýsingar velferðarráðherra um að kominn sé tími til að leiðrétta launakjör starfsmanna þar sem mikill meirihluti sé konur, eigi við um Eflingu. „Enda hefur hann vakið athygli á að launakjör þessa fólks séu allt of lág.“

Efling lítur svo á að breytingar í takt við nýjan stofnanasamning hjúkrunarfræðinga hljóti að ná til allra umönnunarstarfa. Um leið er í umfjöllun á vef Eflingar lýst „verulegum áhyggjum“ af þeirri nálgun spítalans að launabreytingar verði bornar uppi af hagræðingu innan spítalans.

„Við gerum þá kröfu bæði til spítalans og ríkisstjórnarinnar sem rekstraraðila að störf okkar fólks verði tryggð og lagðir verði til nægjanlegir fjármunir til þess að standa undir þessum launabreytingum.“