Ná ekki yfir á græna kallinum

Borgaryfirvöld endurskoða nú svokallaðan græntíma fyrir fótgangandi á umferðarljósum.

Í samantekt Vinnustofunnar Þverár kemur fram að á 34 af 118 ljósagatnamótum komast fótgangandi ekki alla leið yfir götuna á meðan græni kallinn logar. Einfalt sé að gera úrbætur á sumum stöðum en annars staðar þyrfti að gera kostnaðarsamar breytingar á gatnamótunum.

Samantekt Þverár var lögð fram í umhverfis- og skipulagsráði sem íhugar nú næstu skref. Fram kemur að hérlendis er fylgt þýskum staðli um umferðarljós. Þar sé mælt fyrir um gönguhraða fótgangandi og lágmarkslengd á græntíma fyrir þá.

„Hægt er að lengja græntíma fyrir fótgangendur með því að stytta græntíma fyrir bíla,“ bendir Þverá á. Einnig megi breikka miðeyjar á götum og vera með sérljós fyrir gangandi út í eyjuna.

„Ókosturinn við þessa aðferð er að venjulega lengir þetta tímann sem tekur að þvera götuna því fótgangendur þurfa þá að þvera götuna í tveimur áföngum,“ útskýrir Þverá. „Einnig er hætta á því að þeir sem eru lokaðir út á eyju verði óþolinmóðir og gangi yfir á rauðu ljósi með tilheyrandi slysahættu.“ - gar