Sigurður H. Richter hefur fjallað um Hönnunarkeppni verkfræðinema í 20 ár: Kominn tími til að aðrir taki við

„Ég er að verða sjötugur svo það er alveg kominn tími til að aðrir taki við keflinu,“ segir Sigurður H. Richter. Hann stóð á tímamótum í gær þegar hann lét af störfum sem umsjónarmaður sjónvarpsmynda um árlega Hönnunarkeppni véla- og iðnaðarverkfræðinema við Háskóla Íslands.

Sigurð þarf vart að kynna en hann er fyrir löngu orðinn þjóðþekktur fyrir sjónvarpsþætti sína Nýjasta tækni og vísindi, sem voru á dagskrá Sjónvarpsins í þrjátíu ár.

Sigurður segist hafa frétt af Hönnunarkeppninni eftir að fyrsta keppnin var haldin árið 1991. Honum hafi fundist þetta áhugavert viðfangsefni og fengið leyfi til að fjalla um næstu keppni í Sjónvarpinu.

Sigurður segir að margt sé eftirminnilegt frá keppni liðinna ára en það sé erfitt að tína eitthvað sérstakt til. „Á hverju ári er ný þraut lögð fyrir keppendur og mér hefur alltaf fundist jafn merkilegt hvað þeim hefur gengið vel að leysa úr verkefnunum.“

Margir hafa komið að vinnunni við sjónvarpsmyndirnar og segir Sigurður samstarfið hafa verið farsælt. „Verkfræðinemar eiga heiður skilinn fyrir að hafa komið Hönnunarkeppninni á laggirnar. Keppendur hafa komið með skemmtilegar og frjóar hugmyndir og furðulegustu tæki orðið til.“

Sigurður ætlar að halda áfram að fylgjast með Hönnunarkeppninni þótt það verði úr fjarlægð. „Þetta er svo skemmtilegt að ég mun halda áfram að mæta og fylgjast með.“ - gój