Hinsegin dagar hefjast á morgun

Hinsegin dagar hefjast í Reykjavík á morgun. Hátíðin hefur verið haldin árlega frá árinu 1999 en rekur rætur sínar til Frelsisgangna homma og lesbía sem gengnar voru í miðborg Reykjavíkur árin 1993 og 1994.

Hinsegin dagar í Reykjavík hafa vaxið gríðarlega á undanförnum 15 árum. Árið 1999 komu um 1.500 manns saman á Ingólfstorgi að lokinni gleðigöngu en undanfarin ár hafa allt að 90.000 gestir komið saman í miðborg Reykjavíkur í tengslum við hátíðina.

Í ár stendur dagskrá Hinsegin daga í sex daga, hátíðin hefst með hinsegin sögugöngu um miðborgina og kvikmyndasýningu í Bíó Paradís þriðjudaginn 6. ágúst. Dagskrá vikunnar er fjölbreytt og glæsileg og allir ættu að finna eitthvað við sitt hæfi. Sem fyrr nær hátíðin hámarki með gleðigöngu og útihátíð við Arnarhól laugardaginn 10. ágúst þar sem landsmönnum öllum er boðið til sannkallaðrar gleðiveislu.