Innflutt kjúklingakjöt selt á veitingahús

Umræða hefur skapast um að kjúklingaframleiðendur flytji inn frosið kjúklingakjöt og selji sem íslenska vöru. Forsvarsmenn hafa neitað því en þó er erlent kjöt notað í unnar matvörur og selt án þess að tilgreint sé á umbúðum að um innflutt kjöt sé að ræða. Þetta staðfestir Ragnar Hjörleifsson, sölu- og markaðsstjóri Reykjagarðs. „Það sem er unnið höfum við ekki merkt með upprunalandi,“ segir Ragnar.

Hann tekur fram að á öllum þeirra vörum sé rekjanleikanúmer sem segi til um uppruna. Þá var nú í kjölfar umræðunnar bætt við merkingum á ferskar vörur sem sýna að þær séu íslenskar.

Reykjagarður flytur inn 150 til 200 tonn af alifuglakjöti árlega og er stærsti hlutinn kjúklingur. Innflutta kjötið er notað í unnar matvörur. „Þar fyrir utan erum við að selja beint til neytenda, þá er ég að tala um mötuneyti og veitingahús,“ segir Ragnar.

Þannig að fólk sem fer á veitingahús, getur átt von á að fá erlent kjúklingakjöt?

„Við getum ekki svarað fyrir það, en við erum ekki einir að flytja inn kjúkling,“ segir Ragnar.

Aðspurður segir hann ekki verðmun á vörum með innlendu og erlendu kjöti.

Þannig að neytandinn hefur í raun og veru ekki notið góðs af því að þið séuð að flytja inn erlent kjöt?

„Nei, erlent kjúklingakjöt er með háum tolli svo verðmunurinn er í sjálfu sér ekki svo mikill.“

Yfirburðagæði íslensks kjúklingakjöts hafa verið meðal helstu röksemda fyrir því að viðhalda innflutningshömlum og háum tollum.

Af hverju flytjið þið þá inn erlent kjúklingakjöt?

„Það er fyrst og fremst af því við höfum ekki átt allar tegundir alltaf, af því sem við höfum þurft að bjóða  upp á,“ segir Ragnar að lokum.

Fréttamaður fór í verslun og skoðaði umbúðir á unnum vörum sem innihalda kjúklingakjöt, meðal annars nagga og kjúklingastrimla. Pakkningarnar skarta íslensku fánalitunum, en á þeim kemur hins vegar ekkert fram um það hvort um íslenskt eða innflutt kjöt er að ræða.

Við spurðum neytendur hvort þetta skipti þá máli og eins og sjá má í meðfylgjandi sjónvarpsfrétt voru þeir á einu máli. Þeir vilja vita hvaðan maturinn kemur.