Reykjavíkurdætur í lífsháska

„Ekki nóg með það að hafa þroskast í kjaftinum og brunnið af skáldskaparþörf, hafa okkur einnig vaxið horn! Við getum ekki hætt,“ segir Kolfinna Nikulásdóttir, einn meðlima Reykjavíkurdætra, en hljómsveitin hefur vakið mikla athygli undanfarið.

Sveitin samanstendur af 14 stelpum sem rappa. „Þetta er bara fáránlega gaman!“ heldur Kolfinna áfram.

„Reykjavíkurdætur munu skemmta sér og ykkur á Rappkonukvöldi númer 3, sem haldið verður á Gamla Gauknum í kvöld," segir Kolfinna jafnframt, en þær hafa staðið í stífum æfingum fyrir kvöldið.

„Við fórum í sólarhrings-æfingabúðir á Þorláksmessu og urðum næstum því úti í óveðrinu. Það munaði litlu að við misstum allar af jólamatnum. Það tók okkur fjórar klukkustundir að moka litlu rútunni upp úr snjónum, utan vegar!“ segir Kolfinna og bætir við að þessi lífsreynsla hafi styrkt hópinn.

„Dagskráin verður töluvert þéttari fyrir vikið. Það er ekkert sem styrkir hóp meira en að lenda saman í lífsháska,“ segir Kolfinna.

Húsið opnar 21.30.

„DJ Sunna Ben hitar hrollkaldan pöpulinn upp með eðal kvennarappi frá öllum heimshornum,“ segir Kolfinna og bætir við, „ásamt því sem við Reykjavíkurdætur komum til með að æra pöpulinn með okkar tónlist ætlar enginn önnur en Beta Rokk að koma fram, en hún er fræg fyrir lag sitt, Vaknað í Brussel.“

Loks kemur Cell7 til með að loka kvöldinu.

„Ragna, betur þekkt sem Cell 7, var að gefa út nýja plötu sem er tryllt! Hún verður þarna með nýtt efni í bland við gamalt,“ segir Kolfinna og hvetur sem flesta til að mæta, en kvöldin hafa áður vakið mikla lukku.

Reykjavíkurdætur eru:

Þórdís Björk Þorfinnsdóttir

Ásthildur Sigurðardóttir

Valdís Steinarsdóttir

Bergþóra Einarsdóttir

Tinna Sverrisdóttir

Anna Tara Andrésdóttir

Katrín Helga Andrésdóttir

Salka Sól Eyfeld

Kolfinna Nikulásdóttir

Steinunn Jonsdottir

Salka Valsdóttir

Jóhanna Rakel

Þuríður Blær Jóhannsdóttir