Íhugar að leggja vantraustið fram aftur

Þór Saari, þingmaður Hreyfingarinnar, íhugar enn að bera fram vantrauststillögu á ríkisstjórnina ef frumvarp að nýrri stjórnarskrá kemst ekki til afgreiðslu á þinginu.

„Ég er ekkert ákveðinn í því, en það er alltaf sá möguleiki í stöðunni," segir Þór. Hann vonist til þess að stjórnvöldum takist að klára málið. „Þau virðast hafa brett upp ermarnar svolítið síðan og útlitið orðið betra en það var." Ef svo fer hins vegar ekki þurfi hann að fá skýringar á því og verði þær ófullnægjandi kunni vantraust að verða lagt fram.

Spurður hvort hann sé að hóta stjórnarliðum segir hann: „Þetta er engin hótun, þetta er bara staða sem getur komið upp."

Þór lagði fram vantrauststillögu síðdegis á miðvikudag en dró hana til baka í gærmorgun, eftir að í ljós komu formgallar á tillögunni, auk þess sem Þór var ósáttur við að stjórnarliðar hygðust koma málinu á dagskrá strax í gær, en ekki bíða til þriðjudags eins og Þór hafði lagt til.

„Þetta var sambland af ýmsu – þau voru búin að telja hausa og töldu sig vita að tillagan yrði felld. Með því að draga hana til baka hef ég möguleika á að leggja hana fram aftur."

Jóhanna Sigurðardóttir forsætisráðherra sagði í fréttum Stöðvar 2 í gær að tillaga Þórs hefði verið vond og heimskuleg og ekki til þess fallin að vinna stjórnarskrármálinu framgang. Hefði hún verið samþykkt hefði stjórnarskrármálið verið ónýtt.

„Hún verður bara að eiga það við sig," segir Þór. „Mín skoðun er sú að málið sé nánast ónýtt hvort eð er."