Teljum eðlilegt að fá að skrá niður verð

„Það er eðlilegt að það komi upp afmarkaðir þættir við verðkannanir sem menn eru ekki sammála um. Við fáum ábendingar öðru hverju frá verslunum en langoftast ekki. Við metum þær á gagnrýninn hátt en eðlilega hafa þeir kannski aðra sýn á þetta en við.“

Þetta segir Henný Hinz, hagfræðingur hjá ASÍ, um þá gagnrýni fulltrúa nokkurra verslana að ASÍ sinni ekki athugasemdum við niðurstöður verðkannana. Verðtökufólki frá ASÍ var í síðustu viku vísað frá verslunum Hagkaups, Kosts, Nóatúns og Víðis.

Henný segir samkomulag um verðkannanir hafa verið við Samtök verslunar og þjónustu, SVÞ, í mörg ár. „SVÞ sagði sig hins vegar frá þessu fyrir nokkrum árum. Samkomulagið fólst í ákveðnu verklagi. Þá komum við óundirbúið eins og núna. Við settum síðan okkar eigin verklagsreglur. Eini munurinn er sá að við gefum okkur ekki fram við fulltrúa verslunarinnar þegar við erum komin á staðinn. Við erum bara viðskiptavinir sem ganga inn en erum með blöð og penna.“

Að sögn Hennýjar notar ASÍ eingöngu upplýsingar sem eru sýnilegar. „Fólk verslar eftir því sem það sér í versluninni. Það er þar sem það tekur ákvörðunina.“

Hún segir annmarka á því að kaupa vörur þegar gerð er verðkönnun. „Þetta er mjög kostnaðarsamt og villuhættan er eiginlega meiri. Við teljum að viðskiptavinurinn versli ekki á kassanum, heldur inni í búðinni. Við viljum geta sinnt þessu eftirliti án þess að vera í einhverjum leikjum og beita brögðum. Við teljum að við eigum að geta gert þetta í góðu samstarfi við verslanir, eins og það er reyndar í langflestum tilvikum.“