HSÍ vissi ekki að Kári væri skráður á sjúkralista

5. apríl 2013 17:00

Handknattleikssamband Íslands og Kári Kristján Kristjánsson sendu nú síðdegis frá sér yfirlýsingu vegna máls Kára. Hann var rekinn frá félagi sínu, Wetzlar, fyrir að hafa spilað landsleikinn gegn Slóveníu síðastliðinn miðvikudag.

Yfirlýsing HSÍ og Kára Kristjánssonar:

Vegna frétta um riftun á leikmannasamningi Kára Kristjáns Kristjánssonar hjá Wetzlar viljum við taka eftirfarandi fram.

Eins og kunnugt er gekkst Kári undir aðgerð í febrúar sl. þar sem fjarlægt var góðkynjaæxli. Kári hefur síðan unnið að því að komast aftur í leikhæft form með því að mæta á æfingar hjá liði sínu.

Kári kom til liðs við landsliðið sl. mánudag og á þriðjudeginum 2. apríl tilkynnti hann læknum Wetzlar um að hann teldi sig vera heilan heilsu og óskaði eftir að vera tekinn af sjúkraskrá en hann hafði verið skráður á sjúkralista til 4. apríl.

Ræddi hann við báða lækna liðsins þann dag og fékk jákvæð svör við því að vera tekinn af sjúkraskrá.

Kári var því í góðri trú um að geta leikið með Íslandi gegn Slóveníu og var skoðaður af lækni landsliðsins sem taldi að Kári væri leikhæfur. Hann lék því umræddan leik.

Það kom Kára á óvart að fá síðan einhliða tilkynningu frá félaginu um riftun á leikmannasamningi hans. Kári telur sig ekki hafa brotið gegn félaginu á nokkurn hát.

Hans markmið voru að komast í gott form til að geta spilað sem fyrst fyrir lið sitt og klára með sæmd samning sinn við félagið sem lýkur nú í sumar.

HSÍ var ekki kunnugt um að Kári væri skráður á sjúkralista til 4. apríl enda ekki fengið neina tilkynningu þess efnis frá félaginu.

Vikan 1.-8. apríl er landsleikjavika þar sem HSÍ á rétt að fá leikmanninn til að spila fyrir landsliðið.

HSÍ lítur svo á að þar sem Kári var metinn leikhæfur af lækni landsliðsins þá hafi honum verið bæði heimilt og skylt að leika fyrir hönd Íslands í umræddum leik.

HSÍ mun gera allt til að leiða þetta mál farsællega til lykta.

Með kveðju.

Handknattleikssamband Íslands.

Tengdar fréttir

Magnaður sigur í Maribor

Íslenska landsliðið í handknattleik vann magnaðan sigur, 28-29, á Slóvenum í Maribor í kvöld. Íslenska liðið átti magnaða endurkomu í síðari hálfleik og vann frækinn sigur.

3. apríl 2013 15:18

Rekinn frá Wetzlar

Þýska úrvalsdeildarfélagið Wetzlar rak landsliðsmanninn Kára Kristján Kristjánsson frá félaginu í gær. Félagið segir Kára hafa gerst sekan um brot á samningi við félagið og þess vegna hafi félagið ákveðið að segja upp samningnum.

5. apríl 2013 06:45

Fyrirliði Wetzlar orðlaus

Michael Müller, fyrirliði Wetzlar, lýsir mikilli furðu yfir þeirri ákvörðun Kára Kristjáns Kristjánssonar að spila með íslenska landsliðinu gegn Slóveníu í fyrradag.

5. apríl 2013 09:41

Verður Kári rekinn frá Wetzlar?

Þýska dagblaðið Giessener Allgemeine greinir frá því í dag að forráðamenn Wetzlar eru afar óánægðir með að Kári Kristján Kristjánsson hafi spilað með íslenska landsliðinu í gær.

4. apríl 2013 13:26

Aron: Óþolandi vinnubrögð hjá Wetzlar

Vísir fylgdist með blaðamannafundi HSÍ í beinni textalýsingu. Tilefnið var leikur Íslands og Slóveníu í Laugardalshöllinni á sunnudag.

5. apríl 2013 12:45

Datt næstum því úr sófanum þegar ég sá Kára spila

Wetzlar hefur ákveðið að segja upp samningi sínum við íslenska landsliðslínumanninn Kára Kristjánsson eftir að Kári lék með íslenska landsliðinu í Slóveníu í gær. Félagið vissi ekki betur en að Kári væri í veikindaleyfi heima á Íslandi. Þetta kemur fram í tilkynningu á heimasíðu HSG Wetzlar.

4. apríl 2013 16:43