Ákærður fyrir að stela fjórtán milljónum frá ÞSS í Mósambík

Fyrrverandi umdæmisstjóri Þróunarsamvinnustofnunar Íslands í Mósambík, Jóhann Pálsson, hefur verið ákærður fyrir fjórtán milljón króna fjárdrátt þegar hann starfaði í Mósambík. Þetta kemur fram á RÚV.is.

Fréttastofa Vísis og Stöðvar 2 greindi frá því árið 2010 að upp hefði komist um Jóhann skömmu eftir að hann lét af störfum í janúar árið 2010. Í frétt RÚV kemur fram að manninum sé gefið að sök í ákæru að hafa nýtt féð meðal annars  til að kaupa sér toppgrind á bílinn sinn. Hann seldi síðan toppgrindina og nýtti andvirðið í eigin þágu. Hann notaði einnig peninga Þróunarsamvinnustofnunar til að kaupa sér tvo Yamaha-utanborðsmótora, greiddi fyrir viðgerðir á bílnum sínum og fjárfesti í kerru.

Sextíu þúsund dollarar voru millifærðir af reikningi Þróunarsamvinnustofnunar Íslands samkvæmt RÚV. Afgangurinn, rúmir fimm þúsund dollarar eða hálf milljón íslenskra króna, voru í eigu Öryrkjabandalags Íslands sem maðurinn hafði í vörslu sinni vegna starfs síns. Þá fjármuni átti, að því er fram kemur í ákærunni, að nýta til að aðstoða fatlaða í Mósambík.

Geir Gunnlaugsson, landlæknir, starfaði árum saman á vegum stofnunarinnar í Malaví. Hann sagði í samtali við fréttastofu árið 2010 að það starf sem unnið hafi verið á vegum hennar hafi skipt sköpum fyrir fjölda fólks og bjargað mannslífum.

Hver einasta króna geti komið í góðar þarfir og verið til mikilla hagsbóta fyrir fólk í þróunarlöndunum. Með fénu sé unnt að veita fólki heilbrigðisþjónustu og fræðslu sem það hefði annars verið án.  Til dæmis með því að bæta þjónustu við barnshafandi konur, ungbörn, bólusetja fólk og byggja skóla.