Beinþynning eykst hraðar hjá fólki sem fer í magahjáveituaðgerð

Beinþynning eykst hraðar hjá fólki sem gengist hefur undir magahjáveituaðgerð vegna offitu en þeim sem ekki fara í slíka aðgerð. Þetta kemur fram í frumniðurstöðum rannsóknar sem staðið hefur í tvö ár við Háskóla Íslands.

Á bilinu 30-40 manns hér á landi gangast undir magahjáveituaðgerð vegna offitu á hverju ári. Fjallað hefur verið um að næringarupptaka þeirra sem fara í slíka aðgerð minnki töluvert í kjölfarið og þeir verði að vera undir nánu eftirliti lækna. En nú er verið að rannsaka fleiri áhættuþætti eins og beinþynningu hjá þessum hópi.

Díana Óskarsdóttir geislafræðingur hefur fylgst með 50 manns sem hafa farið í magahjáveitu síðustu tvö ár.

„Við erum að reyna sjá hvaða áhrif þessar aðgerðir hafa á beinin en vísbendingar eru um að mikið þyngdartap, getur valdið minnkandi beinþéttni hjá einstaklingum," segir hún.

Og niðurstöðurnar eru sláandi.

„Þéttleikinn í beinunum minnkar eftir aðgerðina við vitum ekki hvað veldur en við erum að reyna átta okkur á því með því að fylgja fólkinu eftir í lengri tíma. Við erum að sjá tölur eftir fyrstu tólf mánuðina, þá er beinþéttnin á mjaðmasvæði að minnka um átta prósent og eftir 24 mánuði erum við að sjá allt upp undir fimmtán prósent sem þéttleikinn í beinunum hefur minnkað."

Ástæðan er ekki þekkt og enn til rannsóknar en til samanburðar er eðlileg beinþynning hjá körlum eftir sextugt innan við eitt prósent á ári og eitt til tvö prósent hjá konum eftir tíðahvörf. Beinþynning er einkennalaus sjúkdómur sem getur valdið beinbrotum við lítinn áverka. Díana ítrekar að ekki sé skynsamlegt að hætta þessum aðgerðum heldur þurfi að vera meira eftirlit með beinþéttni þeirra sem fara í aðgerð.

„Og staðan verði metin áður en fólkið fer í aðgerðirnar hvort það sé ráðlagt að fara út í slíkt, ef þetta verður raunin."