Hætt að taka þátt í fegurðarsamkeppnum

Raunveruleikastjarnan unga, Honey Boo Boo, hefur sagt skilið við barnafegurðarsamkeppnir. Móðir hennar, Mama June Shannon, staðfesti fregnirnar við In Touch Weekly.

„Við erum hættar. Við höfum ekki tekið þátt í keppni um nokkurt skeið því við höfum verið of upptekin með sjónvarpsþáttinn okkar, skólann og lífið sjálft,“ sagði Shannon, en hún og dóttir hennar hafa slegið í gegn í raunveruleikaþáttunum Here Comes Honey Boo Boo sem sýndir eru á TLC.

Honey Boo Boo, sem heitir í raun Alana, er sjö ára gömul og vakti fyrst athygli í þáttunum Toddlers & Tiaras sem fjallaði um þátttakendur í barnafegurðarsamkeppnum.