Jóhanna og Bjarni takast á: Kjörtímabil hinna glötuðu tækifæra

Þau Jóhanna Sigurðardóttir forsætisráðherra og Bjarni Benediktsson, formaður Sjálfstæðisflokksins, tókust nokkuð harkaleg á á Alþingi í morgun í óundirbúnum fyrirspurnum þar sem Bjarni spurði Jóhönnu hvað hefði brugðist í efnahagsstjórn ríkisstjórnar á síðasta ári.

Vitnaði hann til töluvert minni hagvaxtar miðað við spár en gert var ráð fyrir hátt í þriggja prósentu hagvexti fyrir síðasta ár, en staðreyndin var aðeins 1,6 prósent. Þá benti Bjarni ennfremur á að ríkissjóður var ekki rekinn með 20 milljarða halla eins og stefnt var að, heldur 60 milljarða halla.

„Hvað var það sem gekk ekki upp í efnahagsstefnu ríkisins?" spurði Bjarni og bætti við: „Hvað brást?"

Jóhanna svaraði þessu og sagði að þegar stjórnarandstaðan talaði um hagvöxt þá væri eins og hún tryði því að það væri fljúgandi hagvöxtur í nágrannalöndum. „En svo er ekki," sagði Jóhanna. Hún sagði það rétt að það væri vissulega minni hagvöxtur hér á landi, en það yrði þó að horfa til þess að hagvöxtur hefði aukist hér á landi á síðustu tveimur árum. Þá hefði hagvöxtur verið hærri hér á landi heldur en í ríkjum OECD.

Hún játaði að fjárfestingar hefðu ekki gengið eftir eins og ríkisstjórnin vildi. „Fjárfestingar hafa þó verið að aukast síðastliðin tvö ár," sagði Jóhanna og sagði fjárfestingar hér á landi svipað miklar og árið 1997 þegar ríkisstjórnin samanstóð af Framsóknarflokknum og Sjálfstæðisflokki.

„Þannig það er ekki allt kolsvart eins og stjórnarandstaðan lætur líta út fyrir," sagði Jóhanna.

Bjarni kom upp í púlt að öðru sinni og sagði að hagvöxtur væri minni en gæti orðið, „og ekki miðað við OECD lönd eða lönd innan Evrópusambandsins, heldur miðað við lönd sem hafa lent í svona mikilli öldulægð," sagði Bjarni og bætti við: „Þetta er kjörtímabil hinna glötuðu tækifæra."

Jóhanna brást harkalega við ræðu Bjarna og sagði hann láta eins og nágrannalönd, og restin af heiminum, hefðu engin áhrif á ástandið hér á landi. „Það eina sem vantar er að háttvirtur þingmaður horfist í augu við staðreyndir," sagði Jóhanna að lokum.