Ekki frétt af neinum sem beit á

Ekki er vitað til þess að nokkur hafi látið blekkjast af svikapósti sem barst á íslensk netpóstföng fyrir helgi, undir formerkjum Símans. Það segir Gunnhildur Arna Gunnarsdóttir, upplýsingafulltrúi Símans, í samtali við Fréttablaðið.

Í póstinum, sem var skrifaður á óvandaðri íslensku, var viðtakanda tilkynnt að ekki hefði verið hægt að ganga frá greiðslu á reikning og viðkomandi beðinn um að láta í té margvíslegar upplýsingar, meðal annars um greiðslukortanúmer. „Við fengum um tíu tilkynningar strax á laugardagsmorgun, en við höfum enn ekki frétt af því að neinn hafi fallið í gildruna. En þetta er óneitanlega bagalegt, því að þó að pósturinn hafi verið illa skrifaður eru ekki allir okkar viðskiptavinir altalandi á íslensku og einhverjir hefðu getað látið blekkjast.“

Gunnhildur sagði að forsvarsmenn Símans myndu taka ákvörðun í dag um það hvort málið yrði kært til lögreglu.

„En fólk má hafa það í huga í framhaldi af þessu að Síminn biður aldrei um kortaupplýsingar í fjöldapósti,“ segir hún að lokum.

- þj