"Eins og þruma úr heiðskíru lofti"

Pétur Bürcher, biskup kaþólsku kirkjunnar, segir fréttir af afsögn Benedikts páfa hafa komið á óvart.

Óhætt er að segja að afsögn Benedikts páfa hafi komið fólki um allan heim að óvörum. Páfi hafði ekki látið af störfum í um sex hundruð ár þegar Benedikt sextándi tilkynnti að hann myndi láta af störfum undir lok mánaðarins.

„Fréttin kemur í dag einnig til Íslands eins og þruma úr heiðskíru lofti," segir í tilkynningu frá Pétri Bürcher Reykjavíkurbiskup. Biskup vísar í yfirlýsingu páfans frá því fyrr í dag þar sem fram kemur hve erfitt sé fyrir páfa að sinna starfi til heilla fyrir kirkjuna.

„Eftir að hafa hvað eftir annað skoðað samvisku sína frammi fyrir Guði, hafi hann tekið ákvörðun sína af algjörlega frjálsum vilja og kirkjunni til heilla," hefur biskup úr ræðu páfans til kardinálanna í Róm.

Biskup og kaþólskir menn þakka hinum heilaga Föður fyrir þjónustu hans í embætti heilags Péturs, innta af hendi af sterkri trú öllum til fyrirmyndar. Þeir taka undir orð Benedikts XVI páfa sjálfs:

„og nú, látum oss fela heilaga kirkju í umsjá æðsta prests vors, Drottins vors Jesú Krists, og ákalla heilaga Maríu, móður hans, svo að hún aðstoði kardínálana með móðurlegri umhyggju sinni við að kjósa nýjan páfa."