Loka ekki Deildu fyrr en eftir tilmæli frá yfirvöldum

„Virkasta aðferðin til að hindra dreifingu á hugverki Íslendinga hratt og vel er ef fjarskiptafyrirtækin myndu loka fyrir aðgengi að síðum eins og Deildu.net. Málið er þungt fyrir yfirvöld ef forsprakkar slíkra síðna flýja land með starfsemina,“ segir Tómas Þorvaldsson, lögmaður Sambands íslenskra kvikmyndagerðarmanna.

Í vikunni tóku eigendur skráarskiptasíðunnar Deildu.net þá ákvörðun að byrja að deila íslensku myndefni, en það hefur ekki verið leyfilegt á síðunni áður. Í kjölfarið hafa þúsundir manna sótt íslenskt efni á netinu, án leyfis, en talið er að það geti haft veruleg áhrif á íslenskan kvikmyndaiðnað.

Í byrjun árs 2012 var starfsemi síðunnar kærð til lögreglu en málið hefur ekki enn verið leyst. „Það er skýrt brot á lögum að deila efni sem höfundar hafa ekki gefið leyfi til og það er því miður allt of oft í íslensku þjóðfélagi að yfirvöld aðhafast ekki í málum þó að um augljóst lögbrot sé að ræða,“ segir Tómas en bendir þó á að málið sé erfitt. „Vefsíðan er vistuð erlendis, sem gerir það að verkum að erfitt er fyrir yfirvöld að leita uppi forsprakka síðunnar.“ Tómas bendir á að fjarskiptafyrirtækin geti sýnt ábyrgð í verki og lokað fyrir aðgengi notenda á Deildu.

Gunnhildur Arna Gunnarsdóttir, upplýsingafulltrúi Símans, segir að fyrirtækið geti ekki tekið slíka ákvörðun nema fullvíst sé að það standist lög. „Það er nauðsynlegt að yfirvöld taki af skarið í þessu máli og við hjá Símanum höfum þegar óskað eftir því,“ segir Gunnhildur og bætir við að ef lagaramminn væri skýr væri ekkert því til fyrirstöðu að verða við beiðni rétthafa. „Þegar Síminn lokaði aðgangi að síðunni Slembing í kjölfar beiðni frá lögreglu og barnayfirvöldum var sú ákvörðun kærð.“

Hrannar Pétursson, upplýsingafulltrúi Vodafone, segir að fyrirtækið geti ekki aðhafst í málinu án þess að fá skýra skipun frá yfirvöldum. „Vodafone þekkir ekki fordæmi þess að fjarskiptafyrirtæki nokkurs staðar í heiminum ákveði upp á sitt einsdæmi að loka fyrir síður án skýrra lagaheimilda eða úrskurða frá eftirlitsstofnun eða dómstóli.“

Tómasi þykir ummæli fjarskiptafyrirtækjanna ekki standast yfirlýsingar þeirra í viðskiptasáttmálum. „Þar stendur beinlínis að þau áskilji sér rétt til að loka aðgengi og stöðva umferð efnis sem ekki stenst lög og reglur.“

Hann segir að vefsíður á borð við Deildu hafi mjög skaðleg áhrif á skapandi greinar og að tjónið nemi tæplega tveimur milljörðum á ársgrundvelli. „Það er meðal annars vegna sinnuleysis stjórnvalda.“