Leggja til gervieyjar gegn mávaplágunni í borginni

Danska fuglaverndarfélagið, Dansk Ornitologisk Forening, segir hægt að búa í haginn fyrir máva í borgum þannig að ekki verði árekstrar milli þeirra og íbúa í stórum hafnarborgum þar sem hafnarsvæði hefur verið breytt í íbúðarhúsnæði, skrifstofur og verslanir.

Félagið leggur til að búnar verði til gervieyjar, gömlum sílóum breytt í fuglafjöll eða útbúin sérstök varpsvæði fyrir máva, kríur og vaðfugla sem verði afgirt. Þannig geti borgarbúar fengið innsýn í fjölskyldulíf fuglanna.

Í frétt á vef Jyllands-Posten vitnar formaður félagsins, Egon Østergaard, í aðgerðir í Bretlandi þar sem sérstaklega hönnuð varpsvæði virki eins og segull á fuglana. Slík varpsvæði séu betri lausn heldur en tilraunir til að koma í veg fyrir varp þeirra ár eftir ár á flötum húsþökum í borgum.

„Þetta eru áhugaverðar tillögur en þeir eru að fást við vandamál sem eru ólík okkar. Mávum hefur fjölgað óskaplega mikið alla síðustu öld og í Danmörku og Bretlandi hafa mávarnir gengið skrefinu lengra en hér þar sem þeir verpa á þökum í stórum stíl,“ segir Einar Ólafur Þorleifsson náttúrufræðingur.

Nú er mávum hins vegar farið að fækka vegna minna framboðs á fæðu, að því er Einar bendir á. „Frágangur á sorphaugum er að verða betri og fiskúrgangur er ekki jafnaðgengilegur. Mávarnir verða þess vegna aðgangsharðari inni í borgum og bæjum. Þeir eru bara að reyna að bjarga sér. En þótt ætið sem fylgir nútímamenningu lokki þá inn í borgirnar er það ekki nóg og það er alveg ljóst að þeim mun halda áfram að fækka á komandi árum.“

Einar tekur það þó fram að atgangur máva við Tjörnina sé vandamál. „Það hefur verið bent á ýmsar lausnir eins og til dæmis að planta víðirunnum við bakkana sem endurnar geti forðað sér í með ungana þegar mávarnir gera atlögu. Mér líst heldur ekki illa á tillögur Kjartans Magnússonar borgarfulltrúa um að tína reglulega egg undan mávunum í varpinu í eyjunum við Reykjavík. Það myndi hugsanlega duga til að þeir hættu að verpa í Akurey, Engey og Viðey. Það er hvimleitt að hafa þá í svona ofboðslega miklu magni við Tjörnina eða sveimandi yfir grillmat borgarbúa.

Að mati Einars mætti vel hugsa sér að útbúa einhverja staði þar sem mávar fengju að vera í friði til þess að þeir verði ekki á sífelldum vergangi, eins og hann orðar það. „Við viljum ekki að allir mávar hverfi. Það mætti kannski hugsa sér slíkan stað á Geldinganesi eða í Þerney.“