Skipuleggjendur kannabisræktunar óttast ekki lögreglu

Nokkrir einstaklingar sem skipuleggja umfangsmikla kannabisrækt hér á landi hafa af henni umtalsverðar tekjur. Með því að notast við millimenn telja þeir sig ekki þurfa að óttast refsingu, að því er fram kemur í skýrslu ríkislögreglustjóra um skipulagða glæpastarfsemi.

Í skýrslunni segir að íslenski kannabis-markaðurinn sé nú orðinn sjálfum sér nógur. Innflytjendur á fíkniefnum kjósi heldur að flytja inn sterkari efni á borð við amfetamín.

Eftirspurn eftir kannabisefnum hefur aukist. Ríkislögreglustjóri telur að skipuleggjendur kannabisræktunarinnar leggi nú áherslu á fleiri en smærri ræktanir.

Aukin áhersla á heimaræktun tengist að mati ríkislögreglustjóra ekki eingöngu hruninu og erfiðleikum við að fjármagna innflutning. Í skýrslunni er bent á að sama þróun eigi sér nú stað víðar. Áhugi á innfluttu hassi hafi minnkað, og það teljist „sóðalegur“ vímugjafi.

Framboð á amfetamíni stöðugt

Þrátt fyrir að lögregla og tollgæsla hafi á síðustu mánuðum stöðvað mjög stórar amfetamínsendingar til Íslands virðist framboðið stöðugt. Eftirspurnin eftir amfetamíni hér er mikil og viðvarandi.

Ríkislögreglustjóri telur erlenda hópa umsvifamikla á amfetamín-markaðinum, einkum hópar frá Litháen og Póllandi.

Í skýrslunni kemur fram að innflutningur á dýrari fíkniefnum á borð við kókaín hafi minnkað frá því á árunum fyrir bankahrunið. Veruleg eftirspurn var eftir slíkum efnum árið 2008, en nú hefur eftirspurnin dregist saman. Ástæðan sem ríkislögreglustjóri gefur fyrir þeirri þróun eru minni fjárráð fíkniefnaneytenda.

Mikið hefur borið á nýrri tegund fíkniefna í Bandaríkjunum. Efnin eru í mörgum tilvikum tæknilega séð lögleg, en þau eru búin til í efnaverksmiðjum í Suðaustur-Asíu. Efnin finnast ekki í lyfjaskrám og því ekki skráð ólögleg. Um leið og lyfin hafa verið greind og orðin ólögleg geta framleiðendur breytt efnaformúlunni lítillega til að búa til nýtt efni sem þá þarf að finna, greina og banna.

Í Bandaríkjunum hafa um 11 prósent ungmenna á aldrinum 17 til 18 ára prófað þessi efni. Ríkislögreglustjóri telur tilkomu og ört vaxandi markaðshlutdeild þessara efna áhyggjuefni.

Misnotkun á stúlkum þykir viðbjóðsleg

Kynferðisleg misnotkun á stúlkum sem leiðst hafa út í neyslu fíkniefna er algeng og viðtekin, segir í skýrslu ríkislögreglustjóra. Þar segir að menn sem hafi árum og jafnvel áratugum tengst íslenskum undirheimum „fyllist viðbjóði“ þegar þeir lýsi þeim veruleika