Hættu að væla - komdu þér í form

Lífið hafði samband við Arnar Grant einkaþjálfara með meiru og framleiðanda og bað hann um heilsuráð sem vit er í fyrir lesendur Visis.

Gerðu breytingar

„Það er auðvelt að ná árangri en það er bara einn hængur á. Maður þarf að gera breytingar á sjálfum sér til að það gangi eftir. Oftast miklar breytingar," segir Arnar og heldur áfram: 

„Breytingum fylgir alltaf nokkur áhætta. Þegar litið er til líkamsræktar liggur helsta áhættan í því að maður byrji of snarpt, leggi of mikið á sig og líkaminn þoli ekki álagið.  

Þetta fer þó allt eftir því hvernig fólk er uppbyggt. Það er segja hvort fólk sé líkamlega og andlega nógu sterkt til að ráða við álagið," segir Arnar.

Ekki fara of geyst

„Margir Íslendingar eru áhættusólgnir og fara allt of geyst í hlutina. Æfa tvisvar á dag og borða jafnvel of lítið. Og sumir taka jafnvel að birgja sig upp með fæðubótarefnum sem þeir hafa alls enga þörf fyrir og nýtast þeim ekki neitt. Svo eru það aðrir sem vilja breyta sér líkamlega: Fara í fitusog, svuntuaðgerð eða á heilsuhæli." 

„Besta leiðin að öllum breytingum er samt að fara hægt í sakirnar, gera litlar breytingar en varanlegar," segir Arnar.

Ertu til í að koma með nokkur skotheld ráð fyrir byrjendur?



Morgunmatur skiptir öllu

Borða hollan og góðan morgunmat sem inniheldur prótein, kolvetni, góðar fitusýrur, vítamín og steinefni. Dæmi um morgunmat: Tvær lúkur af haframjöli, 20 rúsínur, Hámark helt yfir. ALLT Í EINNI fjölvítamín og omega fitusýrur. 

Vatnsdrykkjan er ekki síður mikilvæg

Drekka vel af vatni. Eitt glas um leið og maður vaknar og eitt glas með öllum máltíðum. Heildar vatnsneysla dagsins ætti að ná að minnsta kosti tveim glösum (2ltr). 

Passa skammtana

Hæfilegar skammtastærðir og ekki láta líða of langt á milli mála. Með því að borða á þriggja tima fresti heldur maður brennslunni við í líkamanum og blóðsykrinum stöðugum. 

Svo eru það millimálin 

Vera alltaf birgur af millimáltíðum. Dæmi um millimáltíðir: Hámark próteindrykkur, Hreysti/Kraftur/Styrkur prótein og trefja stykki, ávextir, hrökkbrauð með kotasælu og grænmeti. 

Bæ bæ sósur

Ekki borða sósur, smjör og brasaðan mat. Og alls ekki mat sem er afgreiddur út um lúgu. 

Hreyfingin

Gerðu æfingarnar, svitnaðu vel í 40-50 mínútur annanhvern dag. Fyrir hraðari árangur æfðu tvo daga og hvíldu einn, æfðu tvo og hvíldu einn og svo framvegis.

Fyrir enn meiri árangur æfðu þrjá daga í röð og hvíldu einn, æfa þrjá, hvíla einn og svo framvegis.

Æfðu heima

10 armbeygjur, 20 magaæfingar, 20 hnébeygjur með hendur beint fram, 20 hopp á staðnum. Byrjaðu á því að fylgja þessari rútinu einu sinni. Næsta dag tvisvar. Næsta dag þrisvar. Gott er að hvíla í 1-2 mínútur á milli umferða. Hver umferð ætti ekki að taka lengri tíma en 2 1/2 mínútu. 

Hvíldu þegar þreytan kallar

Ef þú ert þreytt/ur eða með strengi hvíldu þá þann daginn. Veldu þér bara 2-3 atriði og þú sérð árangur innan skamms. Að ná árangri lyfir manni upp. Þá er maður stoltur og manni líður vel. Sjálfstraustið eykst og manni finnst það sem maður hefur afrekað hafi verið lítið mál eftir allt saman. Það er líka gaman að ná árangri og það geta allir náð árangri sem ná að breyta um stefnu. Það kostar ekki neitt nema viljann. 

Þó að allt annað blási á móti getur maður alltaf náð árangri í heilsurækt. Það er alltaf gaman og alltaf auðvelt ef maður bara byrjar. Ef maður bara byrjar og fer rólega í sakirnar.