Önnur ummæli Víkinga fyrir aganefnd

Framkvæmdarstjóri KSÍ hefur vísað ummælum Ólafs Þórðarsonar, þjálfara 1. deildarliðs Víkings, til aga- og úrskurðarnefndar sambandsins. Þetta kom fram á Fótbolti.net.

Í síðustu viku voru ummælum Heimis Gunnlaugssonar, varaformanns knattspyrnudeildar Víkings, vísað til sömu nefndar. Heimir kallaði Leikni Ágústsson, knattspyrnudómara, sorp íslenskrar knattspyrnu.

Ólafur sagði eftir 2-2 jafntefli Víkinga gegn Haukum á laugardaginn að íslenskir dómarar væru að leggja lið sitt í einelti.

„Þeir virðast allir ætla að hefna fyrir það sem gerðist á Leiknisvelli þegar einhver stjórnarmaður hjá Víkingi missir eitthvað út úr sér. Þá á það að bitna á liðinu í næstu tíu umferðum. Þetta gengur ekki upp,“ sagði Ólafur.

Aga- og úrskurðarnefnd hefur enn ekki úrskurðað í máli Heimis.