3.200 manns skora á Vigdísi að segja af sér

Um 3.200 manns hafa nú skráð sig á undirskriftarlista þar sem skorað er á Vigdísi Hauksdóttur, þingmann Framsóknarflokksins og formann fjárlaganefndar, að segja af sér formennsku í fjárlaganefnd Alþingis og víkja úr hagræðingarhópi ríkisstjórnarinnar.

Undirskriftarsöfnunin, sem var hrint af stað þann 14. ágúst síðastliðinn, á rætur sínar að rekja til ummæla Vigdísar í viðtali í útvarpsþættinum Ísland í Bítið á Bylgjunni þar sem hún fór hörðum orðum um fréttastofu Ríkisútvarpsins og sagðist ósátt við vinnubrögð hennar vegna fréttar þar sem rangt var eftir henni haft. Þegar Vigdís var í útvarpsþættinum spurð hvort hún ætlaði að taka málið lengra benti hún á að hún ætti sæti í hagræðingarhópi ríkisstjórnarinnar. Fjölmargir túlkuðu þessi ummæli hennar sem hótun um niðurskurð vegna ritstjórnarstefnu fréttastofu RÚV.

Vigdís svaraði fyrir ummælin í síðustu viku þar sem hún neitaði að hafa haft í hótunum um niðurskurð.