Árituð treyja Ronaldos boðin upp í kvöld

„Við munum bjóða upp treyju áritaða af Cristiano Ronaldo, málverk eftir Sylvíu/Love Punk og Theódóru Loftsdóttur, treyju áritaða af knattspyrnuliði Reading, fatnað eftir íslenska hönnuði auk ýmissa gullmola sem við fundum í fatagámum Rauða krossins,“ segir Þuríður Ragna Jóhannesdóttir, ein af þremur konum sem skipuleggja Hönnun & House maraþon, sem er styrktarsöfnun fyrir Rauða krossinn. „Við höfum fundið ótrúlegustu hluti í þessum gámum, meðal annars Karl Lagerfeld-jakka,“ bætir Þuríður við.

Hönnun & House maraþonið hest klukkan 12 í dag og fer hátíðin fram í Gamla bíói. „Þetta verður rosalega spennandi. Við erum með mikinn fjölda hönnuða sem munu selja verkin sín, við verðum með fatamarkað, uppboð og svo auðvitað hústónlist í þrettán klukkutíma í þakíbúð Gamla bíós,“ segir Þuríður. Auk hennar skipuleggja þær Árný Björk Sigurðardóttir og Matthildur Sunna Þorláksdóttir hátíðina.

Allur ágóði af hátíðinni rennur til jólaúthlutunar Rauða kross Íslands. „Við gerum þetta algjörlega í sjálfboðavinnu en þetta hefur verið þess virði. Þetta er annað árið sem við höldum svona hátíð. Í fyrra var þetta miklu smærra í sniðum. Í ár ákváðum við að stækka við okkur og byrjuðum að skipuleggja í júní. Við höfum verið algjörlega á haus undanfarna tvo mánuði, en þetta hefur verið rosalega gefandi,“ útskýrir Þuríður.

Meðal hönnuða og verslana sem styðja við hátíðina eru: Ella, Forynja, Einvera, Arfleið, Volcap, Helicopter, Lín Design og Stjörnubörn, Dýrka, Gullkúnst Helgu, Nostalgía og Spútník. „Síðan verðum við með tískusýningu og uppboð um kvöldið og mun DJ Margeir sjá um tónlistina. Það hefst klukkan 20 og stendur til 23. Elín Ey, Þórunn Antonía, Friðrika Hjördís Geirsdóttir og fleiri yndislegar konur munu sýna fötin sem fara á uppboð. Þær hafa sjálfar lýst yfir áhuga á að kaupa þær flíkur sem þær sýna, þannig að það er hörð samkeppni um þær vörur sem fara á uppboðið,“ segir Þuríður.

Hátíðin hefst á svokallaðri Lunchbeat-skemmtun í hádeginu og mun DJ Bensol stýra tónlistinni. Tólf aðrir hústónlistarmenn munu kom fram í Gamla bíói. Hönnuðirnir Ólöf Rut Stefánsdóttir og Hjörtur Matthías Skúlason munu vera með táknrænan gjörning á milli 12 og 18. Gestir geta lagt hönd á plóg í gjörningnum sem mun endurspegla á huglægan hátt starf Rauða krossins. Uppboðið hefst svo klukkan 20 um kvöldið. Hönnuðir munu selja vörur á göngum Gamla bíós allan daginn og verður fatamarkaður í kjallaranum.