Enginn ætti að búa við fátækt

Skýrsla um fátækt var kynnt fyrir fulltrúum stjórnmálaflokkana á dögunum. Skýrslan sem kom út í október sl. er afrakstur samstarfshóps á vegum Hjálparstarfs kirkjunnar og Rauða krossins í Reykjavík um enn betra samfélag. Að gerð skýrslunnar kom breiður hópur fólks og voru þátttakendur í verkefninu fulltrúar ýmissa stofnana, félaga- og mannúðarsamtaka ásamt notendum velferðarþjónustunnar.

8.800 börn búa við fátækt

Í skýrslunni kemur m.a. fram að um 40.000 landsmanna voru undir lágtekjumörkum, eða í hættu á félagslegri einangrun, árið 2011. Til að falla í þennan hóp þurfa einstaklingar að vera undir lágtekjumörkum, búa við verulegan skort á efnislegum gæðum eða búa á heimilum þar sem atvinnuþátttaka er mjög lítil. Lágtekjumörk voru 153.600 krónur í ráðastöfunartekjur fyrir einstakling sem bjó einn árið 2011. Hagstofan hefur áætlað að um 27.700 manns séu undir lágtekjumörkum og búi við fátækt og þar af séu um 8.800 börn. Rannsóknir hafa líka varpað skýru ljósi á kjör öryrkja og þá fjárhagslegu erfiðleika sem margir þeirra glíma við til lengri tíma og þau áhrif sem fátækt hefur á þá og fjölskyldur þeirra.

Lágmarksframfærsluviðmið undir fátæktarmörkum

Á yfirstandandi kjörtímabili gaf velferðarráðherra út lágmarksframfærsluviðmið. Það vekur athygli að lágmarksframfærsluviðmið velferðarráðherra, 127.700 krónur fyrir barnlausan einstakling, er langt undir fátæktarmörkum. Það er til skammar.

Hægri - Vinstri

Hugmyndafræði markaðshyggjunnar sem hefur tröllriðið hinum Vestræna heimi og við fengum að prófa hana í ríkisstjórnartíð Sjálfstæðis- og Framsóknarflokksins sem leiddi þjóðina í kreppu. Kreppan hefur leitt marga í gildru fátæktar. Við það verður ekki unað lengur. Við höfum fengið að kynnast hugmyndafræði hreinnar vinstristjórnar síðustu 4 ár í ríkisstjórnartíð Samfylkingar og Vinstri Grænna sem ekkert hafa aðhafst til að sporna við hækkunum sem skella á heimilunum. Verðtryggðu lánin hækka stöðugt og engin viðbrögð eru gegn verðtryggingu þeirra. Áherslan er á ríkisforsjá og öflugt bótakerfi. Fullfrískt fólk á besta aldri þarf nú að leita í það til að standa undir lágmarkslífskjörum. Við það verður heldur ekki lengur unað. Hugmyndafræði fjórflokkanna er komin í þrot. Það eiga allir rétt á a.m.k. lágmarkslífskjörum og að lifa með reisn.

Réttlæti, sanngirni, lýðræði

Dögun er nýtt stjórnmálafl sem býður nú fram í fyrsta skipti undir kjörorðunum réttlæti, sanngirni og lýðræði. Dögun er svar við kalli þjóðarinnar um gagngerar breytingar á íslensku samfélagi. Í stefnu Dögunar eru samþykktar öflugar aðgerðir í þágu heimilanna. Við viljum leysa skuldavanda heimilanna með róttækum hætti og bæta aðstöðumun almennings gagnvart fjármálavaldinu. Við viljum líka tafarlaust afnám verðtryggingar á neytendalánum og almenna leiðréttingu húsnæðislána. Þá viljum við að lágmarksframfærsluviðmið verði lögfest og að vextir í landinu verði hóflegir.

Stefnu Dögunar er hægt að skoða betur á heimasíðu samtakanna: www.xT.is.

Dögun er svarið

Opinber framfærsla og lægstu launataxtar verkalýðsfélaga eru langt undir neysluviðmiðum velferðarráðuneytisins. Við viljum að lagt verði mat á hvort ástæða sé til að endurskoða viðmið ráðuneytisins og þá aðferðafræði sem notast er við til útreikninga. Þar ber að horfa til leiða sem miða að því að áætla eðlilega framfærslu fyrirfram, annað hvort af hópi sérfræðinga eða af nefnd sem skipuð er almenningi, til að tryggja að viðmiðið endurspegli ekki undirliggjandi samfélagslegan mismun. Það þarf að tryggja raunhæf lágmarksframfærsluviðmið og setja gólf á þau.

Mannréttindi

Það eru mannréttindi að geta séð sjálfum sér farborða og vera ekki á framfæri annarra. Bótakerfið á að vera öflugt en það á aðeins að vera fyrir þjóðfélagsþegana sem geta ekki séð sér farborða vegna veikinda en ekki fyrir fullfrískt fólk.