Hótel nýs hótelrisa að rísa við Hellu

Framkvæmdir eru hafnar við hundrað og þrjátíu herbergja hótel við útjaðar Hellu. Verða engar vöflur hafðar á því Hreiðar Hermannsson, framkvæmdastjóri Stracta konstruktion ehf, og Drífa Hjartardóttir, sveitarstjóri Rangárþings ytra, skrifuðu undir lóðarsamning í síðustu viku og hótelið á að verða tilbúið fyrir fyrstu gesti í síðasta lagi 1. maí á næsta ári.

„Þetta hefur gríðarlega þýðingu fyrir okkur,“ segir Drífa. „Bæði fær sveitarfélagið náttúrulega fastaeignagjöld af þessu en svo er þetta mikilvægt fyrir atvinnulífið, það munu að minnsta kosti þrjátíu manns starfa við hótelið.“

Byggðarþróun hefur frekar verið Hellu jákvæð en þar bjuggu innan við sex hundruð manns um síðustu aldamót. Nú eru íbúarnir nálægt því að vera átta hundruð.

Lóðin er 15.000 fermetrar enda er ekki um eina byggingu að ræða heldur nokkrar húsaraðir, tvö einbýlishús og svo trónir stórt hús með veislusal og fleiru í miðið.

Utan um allt er síðan mikill garður þar sem gestir eiga að hafa ýmislega við að vera. Þar verða útivistarsvæði þar sem meðal annars verður hægt að grilla og eins verða þar leiksvæði fyrir börn og heitir pottar.

„Við viljum halda í gestina svo þeir séu ekki bara að gista í eina nótt og síðan farnir út í bíl og af stað. Þannig að fólk á að geta kynnst öðrum gestum,“ segir Hreiðar.

Áform Stracta ná hins vegar langt út fyrir Rangárþing ytra en stefnt er að því að reisa alls tíu hótel víða um land. Auk hótelsins á Hellu munu álíka hótel í eigu Stracta verða opnuð bæði á Húsavík og á Orrustustöðum, skammt austan við Kirkjubæjarklaustur, á næsta ári. Svo stendur til að reisa svipuð hótel í Hornafirði, á Egilsstöðum, Sauðárkróki, Hólmavík, Stykkishólmi, einhvers staðar í Árnessýslu og svo í Vestmanneyjum, heimaslóðum Hreiðars. Hann segir góðar horfur í þessum málum.

„En auðvitað geta orðið einhverjar tafir í skipulagsmálunum sem hafa áhrif á þetta en stefnan er þessi.“