Jón Baldvin gagnrýnir Háskólann harðlega

Jón Baldvin Hannibaldsson, fyrrverandi utanríkisráðherra, ritar greinina Háskóli Íslands: Talibanar í fílabeinsturni? sem birtist í Fréttablaðinu og á Vísi í dag þar sem hann gagnrýnir Háskóla Íslands harðlega.

Forsaga málsins er sú að farið var fram á það við Jón Baldvin að hann tæki að sér að kenna námskeið um stöðu smáþjóða í alþjóðakerfinu.

Hann féllst á það en svo var sú umleitan dregin til bara, að sögn vegna þrálátra umkvartana kennara í „einhverju sem kallast „kynjafræði“ eins og hann skrifar sjálfur í greinina.

Hann segir þá, og Háskólann þar með, byggja málflutning sinn á fjölmiðlum sem farið hafi offari en ekki afgreiðslu réttarríkisins.

Jón Baldvin spyr hvað sé að frétta af útvörðum réttarríkisins og mannréttinda innan hins akademíska samfélags á Íslandi?

„Eða eigum við að trúa því að þeir sem öðru fremur eiga að standa vörð um mannréttindi í siðaðra manna samfélagi láti kúgast af hótunum ofstækisfulls sértrúarsöfnuðar, sem gengur fram í nafni pólitísks rétttrúnaðar?“

Háskóli Íslands var harðlega gagnrýndur fyrir að fá Jón Baldvin til þess að kenna í skólanum. Meðal annars birtist grein á femíniska vefritinu knuz.is eftir þær Hildi Lilliendahl Viggósdóttur og Helgu Þórey Jónsdóttur undir yfirskriftinni: Háskóli Íslands - griðastaður dónakarla?

Daði Már Kristófersson, forseti félagsvísindadeildar, sagði í samtali við Vísi í vikunni að í pistlinum hefðu komið fram sjónarmið sem þyrfti að ræða. Niðurstaðan var sú að Jón Baldvin kennir ekki í skólanum.