Jólatónar í Grafarvogi

Efnt er til hátíðlegra og hugljúfra Jólatónleika í Grafarvogskirkju í dag. Áhersla er lögð á nýjabrum, fumsköpun og grósku nýrrar kynslóðar að sögn Hákonar Tuma Leifssonar, organista Grafarvogskirkju. Hann segir sérstaka gesti vera annars vegar dúóið Sigríði Thorlacius og Guðmund Óskar Guðsmundsson og hins vegar fimm manna hljómsveitina Ylju.

„Þetta fólk er allt verðugir fulltrúar nýrrar kynslóðar listamanna í dægurtónlistinni,“ segir hann og lýsir því og efnisskránni nánar. „Sigríður og Guðmundur munu flytja lög af nýútkomnum jóladiski sínum sem heitir því vinalega nafni Jólakveðja. Diskurinn hefur að geyma lög eftir Guðmund Óskar og Bjarna Frímann Bjarnason. Ylja hefur farið víða um völl að undanförnu og fengið góðar undirtektir. Hún er órafmögnuð hljómsveit og á þessum tónleikum flytur hún einkum jólatengt efni.“

Þá koma fram þrír kórar kirkjunnar sem flytja ýmis jólalög, bæði innlend og erlend, og eiga án eftir að koma tónleikagestum í jólaskap, að sögn Hákonar. „Vox Populi er sönghópur sem fæst helst við gospel og létta tónist. Hann kemur fram við ýmis tilefni og nýtur leiðsagnar Hilmars Arnar Agnarssonar nú um stundir. Hann ætlar að flytja ýmis jólalög úr sjóði sínum.

Stúlknakór Reykjavíkur í Grafarvogskirkju mun koma með glitrandi geisla æskufjörs inn á tónleikana. Hann var stofnaður af Margréti Pálmadóttur en er þjálfaður þessa mánuðina af Guðrúnu Árnýju Guðmundsdóttur. Í kórnum eru tæplega 40 krakkar sem allir búa í Grafarvoginum. Kórinn mun meðal annars flytja jólasyrpu eftir Mons Takle,“ lýsir Hákon Tumi sem sjálfur mun stjórna kór Grafarvogskirkju sem syngur jólalög í léttum anda.

„Óhætt er að fullyrða að mikillar fjölbreytni gæti á þessum tónleikum,“ segir Hákon Tumi og tekur fram að miðaverði sé stillt í hóf því aðgangur kosti einungis 1.500 krónur.