Fólk hvatt til að vera ekki á ferðinni

Ferðaaðstæður hafa spillst og geta versnað enn frekar næsta sólarhringinn. Fólk er hvatt til að vera ekki á ferðinni nema brýna nauðsyn beri til.

Þetta kemur fram í tilkynningu Slysavarnafélagsins Landsbjörg.

Síðastliðinn sólarhring hafa björgunarsveitir aðstoðað ferðalanga um allt land í kjölfar veðurofsa og enn spáir Veðurstofan slæmu veðri.

„Það hefur verið töluvert mikið af fokútköllum ásamt aðstoð við fólk í föstum bílum uppi um allar heiðar og hálendi. Útköllin hafa annars verið mjög dreifð um landið,“ segir Ólöf Snæhólm Baldursdóttir upplýsingafulltrúi SL.

Ólöf segir umhugsunarefni hve margir af þeim sem festa bíla sína eru erlendir ferðamenn. „Þeir þekkja ekki aðstæður, fá ekki skilaboð um slæma veðurspá og eru á bílum sem henta ekki til vetraraksturs. Ferðaþjónustuaðilar verða að vera duglegri að koma upplýsingum til ferðamanna,“ segir Ólöf.

Kári Viðar Rúnarsson, verkstjóri hjá Íslenskum aðalverktökum, og hópur hans eru að vinna að verkefni fyrir Landsvirkjun austan við Snæfell. Þeir börðust við óveðrið í morgun en þeir vinna í 800 metra hæð yfir sjávarmáli.

Þegar ljósavélin hætti að virka þurftu þeir að leggja niður vinnu og leita skjóls í Laugarfellsskála. Þar eru þeir nú í góðu yfirlæti á meðan veðrið gengur yfir.

„Það tók okkur tvo og hálfan tíma að koma okkur niður í skálann úr vinnubúðunum. Undir venjulegum kringumstæðum tekur það 10-15 mínútur,“ segir Kári en hann er vanur björgunarsveitarmaður og því alvanur svona aðstæðum.