Uppfært: "Ekki er skylda að vera með sjúkrabíl á leikjum“

„Ekki er skylda að vera með sjúkrabíl á leikjum,“ segir Ómar Smárason, leyfis- og markaðsstjóri KSÍ, en um 9 mínútur liðu áður en sjúkrabíll kom á vettvang þegar Elfar Árni Aðalsteinsson, leikmaður Blika, slasaðist illa í leik á móti KR fyrr í kvöld.

„Það er skylda að vera með lækni á bekknum, allavega hjá heimaliðinu. Ekki skylda fyrir gestaliðið að koma með lækni.“

Hann segir það einnig vera skyldu að leikvangar séu búnir hjartastuðtæki en kallað var eftir því í kvöld þegar Elfar Árni hneig niður.

„Þrátt fyrir að það sé ekki skylda að sjúkrabíll sé til staðar á vellinum þarf aðgengi fyrir sjúkrabíla að vera tryggt. Í Kópavogi er þessi aðgangur til staðar, bíllinn keyrir niður við Sporthúsið.“

Elfar Árni fór í gegnum heilaskann í kvöld og kom í ljós að niðurstöður úr heilaskönnun lofa góðu.

ATHUGASEMD:

Ómar Smárason segir að ekki séu allir sammála um skyldu þess að vera með lækni á leikjum.

Orðalag Handbókar leikja KSÍ er eftirfarandi:

„Öll lið ættu að vera með lækni og sjúkraþjálfara á bekknum. Í staðalformi

leikmannasamnings er þess getið í kafla um skyldur félags að samningafélag skuli „sjá til þess að á leikjum meistaraflokks sé til taks læknir, hjúkrunarfræðingur eða sjúkraþjálfari“.“

Orðið ættu hefur verið túlkað mismunandi og segir Ómar málið verða tekið fyrir sem fyrst þar sem að hans sögn ætti auðvitað að vera skylda að hafa lækni á leikjum.

Þórir Hákonarson, framkvæmdarstjóri KSÍ, segir að það sé skylda að vera með sjúkraþjálfaðan mann á bekknum og þannig ætti að túlka þessa reglugerð.