Komnir í grunnbúðir Everest

Guðmundur Stefán Maríusson og Ingólfur Geir Gissurarson komu í grunnbúðir Everest síðastliðinn föstudag. Grunnbúðir Everest sunnan megin í fjallinu eru staðsettar í tæplega 5400 metra hæð yfir sjávarmáli. 

Þeir Ingólfur og Guðmundur flugu utan snemma morguns laugardaginn 30. mars. Flogið var í gegnum Frankfurt og Dubai og lent í Khatmandu kvöldið eftir. Strax 1. apríl hittist hópurinn í Khatmandu. Miðvikudaginn 3. apríl hófst ferðin með stuttu flugi til Lukla þar sem göngumenn öxluðu bakpokana og gengu af stað. Frá Lukla er u.þ.b. 60-70 kílómetra leið upp í grunnbúðir Everest en hæðarhækkun um 2600 metrar.

Á leiðinni í grunnbúðir dregur mjög úr súrefni í andrúmsloftinu og því er ákaflega mikilvægt að fara sér hægt enda flestir leiðangursmanna að koma af svæðum sem standa við sjávarmál. Reynslan hefur því kennt mönnum að fara sér hægt og leyfa líkamanum að laga sig að súrefnisskortinum hægt og bítandi. Með því móti komast flestir hjá því að finna fyrir hæðarveiki sem oft er  fylgifiskur í göngum á há fjöll.

Hægt er að fylgjast með ferðinni á www.everest2013.is, en hér að neðan er ferðaskipulag Guðmundar og Ingólfs

30. mars Brottför frá   Íslandi. Flogið til Frankfurt, Dubai og þaðan til Khatmandu.

31. mars Komið til   höfuðborgar Nepal, Kathmandu.

1. apríl Búnaðarskoðun og  hópurinn kemur saman.

2. apríl Gengið frá búnaði fyrir göngu og skoðunarferð um borgina.

3. apríl Flogið til Lukla sem er þorp í í tæplega 2900 metra hæð yfir sjávarmáli.

3.-12. apríl Gengið um fjalladali Nepals að rótum Everest í grunnbúðir sem eru  í 5300 metra hæð.

13. apríl - 4.   maí Hæðaraðlögun -  Á þeim tíma verður farið upp í efri búðir á fjallinu með búnað og gist þar. Fyrstu búðir eru í 5900 metrum, aðrar búðir í 6400 metrum og þriðju búðir í   7300 metrum yfir sjávarmáli.

5.-12. maí Hvíld í grunnbúðum eða ennþá neðar.

13.-25. maí Áætlaður tími til að ná settu markmiði.

26.-27. maí Frágangur og undirbúningur brottfarar úr grunnbúðum.

27.-31. maí Gengið niður fjalladali Nepla til Lukla.

1. júní Flogið frá Lukla til Kathmandu.

2. júní Flogið frá Kathmandu áleiðis til Íslands í gegnum Dubai og Frankfurt.

3. júní Heimkoma til   Íslands.