Enn snjóflóðahætta í Ólafsfjarðarmúla

Búið er að opna þá vegi sem verið hafa lokaðir vegna snjóflóða eða snjóflóðahættu. Í Ólafsfjarðarmúla varúðarstig þó ennþá í gildi.

Það eru hálkublettir á Sandskeiði, Hellisheiði og í Þrengslum en hálka eða hálkublettir eru víðast hvar á SuðurlandiHálka eða snjóþekja er á vegum á Vesturlandi. Fróðárheiði er þungfær.Á sunnanverðum Vestfjörðum er fært frá Bíldudal að Brjánslæk en ófært þaðan austur fyrir Klettsháls. Þar er verið að moka Ísafjarðardjúp, Steingrímsfjarðarheiði og Þröskulda, og einnig norður í Árneshrepp.

Á Norðurlandi vestra er hálka og skafrenningur eða él. Þæfingsfærð er á Siglufjarðarvegi.Það snjóar á Norðurlandi eystra og þar er víðast hvar snjóþekja á vegum. Þæfingsfærð er á kaflanum um Hálsa og Hófaskarð.Snjóþekja er á flestum vegum á Austurlandi. Þungfært er á Háreksstaðaleið en þæfingur er á Fjarðarheiði. Nokkur hálka er niðri á Fjörðum en autt frá Djúpavogi með ströndinni suður um.

Vegna vinnu við víravegrið á Reykjanesbraut við Grindavíkurvegamót verður vinstri akrein á leið til Reykjavíkur lokuð í dag á milli kl.10:00 og kl.17:00. Þá er hraði á vinnusvæðinu tekinn niður í 50 km á klst. Vegfarendur eru beðnir að sýna aðgát og virða merkingar.

Þá er varað við Hreindýrahópum sem nú halda til við veg í Hamarsfirði, Álftafirði og í Reyðarfirði. Vegfarendur eru beðnir að sýna aðgát.