Heiðar kemst ekki lengur í hópinn hjá Fylki

Það vakti athygli að Heiðar Geir Júlíusson skildi ekki vera í leikmannahópnum hjá Fylki er liðið mætti KR í Lautinni í gær.

Heiðar Geir kom heim úr atvinnumennsku frá Svíþjóð fyrir sumarið og er óhætt að segja að hann hafi ekki staðið undir væntingum hjá Fylkismönnum.

Miklar væntingar voru gerðar til leikmannsins fyrir sumarið en hann hefur ekki staðið undir þeim og verið slakur.

Ásgeir Ásgeirsson, formaður knattspyrnudeildar Fylkis, sagði að leikmaðurinn hefði einfaldlega ekki komist í hóp í gær.

Orðrómur er uppi um að búið sé að reka Heiðar frá félaginu en Ásgeir sagði hann ekki vera réttan. Ásgeir vildi ekki tjá sig um það hvort félagið væri að reyna að losa sig við hann.

"Ef svo væri þá myndum við gefa það út. Ekkert slíkt hefur verið gert," sagði Ásgeir.