Hafna sjálfstæðu gjaldi á ferðamenn

Meirihluti sveitarstjórnar Rangárþings eystra hafnaði tillögu fulltrúa Sjálfstæðisflokksins um gjaldtöku á ferðamannastöðum á vegum sveitarfélagsins.

Í tillögunni var gert ráð fyrir gjaldi við ferðamannastaði sem Rangárþing eystra ber kostnað af. Gjaldið ætti að skila 20 milljónum króna á næsta ári.

„Víðar eru fjölsóttir staðir sem sveitarfélagið hefur séð um að bæta aðgengi að og veruleg útgjöld hafa skapast hjá sveitarfélaginu vegna þessa og er því ekki óeðlilegt að þeir sem njóta og nota greiði hóflegt gjald til viðhalds þessara náttúruperlna,“ segir í greinargerð með tillögunni sem meirihluti fulltrúa Framsóknarflokksins hafnaði.

Framsóknarmenn sögðu Rangárþing eystra ekki geta hafið einhliða gjaldtöku við Skógafoss og Seljalandsfoss. Landið væri ekki í einkaeigu sveitarfélagsins.

„Landið við Skógafoss er til dæmis í eigu fimm sveitarfélaga og Seljalandsfoss og nærsvæði er í eigu nokkurra aðila. Tillögunni er þess vegna hafnað að svo stöddu máli, enda engin útfærsla fólgin í henni önnur en tekjuliðurinn,“ bókaði meirihlutinn sem vitnaði til þess að ráðherra ferðamála væri að skoða leiðir til að hefja gjaldtöku hjá ferðamönnum.

„Ráðherra hefur boðað að þessar leiðir verði tilbúnar á næsta ári, til dæmis í formi svokallaðs náttúrupassa. Ráðherra hefur eindregið hvatt aðila til þess að bíða með gjaldtöku á ferðamannastöðum þar til tillaga hefur verið staðfest,“ bókuðu framsóknarmenn.

Í tillögu sjálfstæðismanna var bent á að fyrstu átta mánuði þessa árs væri áætlaður fjöldi ferðamanna við Seljalandsfoss um 190 þúsund og við Skógafoss um 238 þúsund. Á þessum stöðum hefði verið komið fyrir stigum auk þess sem sveitarfélagið ræki þar salerni.

„Nokkurs misskilnings gætir í bókun meirihlutans sem þarf að leiðrétta. Ekki er lagt til að sveitarfélagið taki einhliða upp gjaldtöku á ferðamannastöðum án samráðs við landeigendur eða aðra hlutaðeigandi,“ bókuðu sjálfstæðismenn sem kváðu furðu sæta að fella tillöguna en leggja hana lítillega breytta aftur til í bókun sem þá þyrfti að afgreiða á öðrum sveitarstjórnarfundi.

„Hefði verið nær, að okkar mati, að leggja fram breytingartillögu við framkomna tillögu okkar sem líkur eru á að sátt hefði náðst um í dag.“